By អន្តរជាតិ៖ ព្យុះកួចដ៏ខ្លាំងក្លាបានបំផ្លាញតំបន់ជនបទភាគខាងត្បូងរដ្ឋ Michigan សហរដ្ឋអាមេរិក នាំឱ្យមនុស្សយ៉ាងតិច ៤នាក់បាត់បង់ជីវិត និងជាង ១០នាក់ទៀតរងរបួស កាលពីថ្ងៃសុក្រ ទី៦ ខែមីនា ឆ្នាំ២០២៦។ គ្រោះថ្នាក់ធម្មជាតិនេះបានបំផ្លាញផ្ទះជាច្រើនខ្នង និងធ្វើឱ្យប្រជាជនរាប់រយនាក់គ្មានអគ្គិសនីប្រើប្រាស់។
ភ្លាមៗបន្ទាប់ពីសេវាអាកាសធាតុជាតិបានចេញការព្រមានអំពីព្យុះកួចសម្រាប់តំបន់នោះ វីដេអូនៅលើបណ្តាញសង្គមពីទីក្រុង Three Rivers និង Union City បានបង្ហាញឱ្យឃើញខ្យល់កួចដ៏ធំដែលហែកដំបូលអគារ និងបក់កម្ទេចកម្ទីប៉ើងទៅឡើងលើអាកាស។
រូបភាពវីដេអូពីប្រព័ន្ធផ្សព្វផ្សាយក្នុងស្រុកបានបង្ហាញពីអគារ និងរថយន្តដែលខូចខាត ព្រមទាំងបង្គោលភ្លើង ដើមឈើ និងផ្លាកសញ្ញាផ្លូវដែលត្រូវបានខ្យល់បក់បោកដួលរលំ។ ការិយាល័យតម្រួតតំបន់បានឱ្យដឹងថា មានមនុស្ស ៣នាក់បាត់បង់ជីវិត និងរបួសរាប់សិបនាក់ត្រូវបានរាយការណ៍នៅក្នុងតំបន់ Branch County ជាកន្លែងដែលទីក្រុង Union City ស្ថិតនៅ។
យោងតាមអាជ្ញាធរមូលដ្ឋាននៅទីនោះ មនុស្សម្នាក់បានស្លាប់ និងជាច្រើននាក់រងរបួសនៅក្នុងតំបន់ Cass County។ មន្ត្រីមូលដ្ឋានបានបន្ថែមថា ការដាច់ចរន្តអគ្គិសនីបានប៉ះពាល់ដល់មនុស្សរាប់រយនាក់។ អភិបាលរដ្ឋ Michigan លោកស្រី Gretchen Whitmer បាននិយាយថា លោកស្រីបានចាប់ផ្តើមដំណើរការមជ្ឈមណ្ឌលប្រតិបត្តិការសង្គ្រោះបន្ទាន់រដ្ឋដើម្បីតាមដានស្ថានភាព៕
ដោយ៖ តារា
