អ៊ីរ៉ង់ប្រកាសផ្អាកការវាយប្រហារទៅលើប្រទេសជិតខាង បន្ទាប់ពីពង្រីកការវាយប្រហារលើ១២ប្រទេស

ភ្នំពេញ៖ ប្រធានាធិបតីអ៊ីរ៉ង់ លោក Masoud Pezeshkian បានប្រកាសនៅថ្ងៃសៅរ៍ថា ក្រុមប្រឹក្សាភិបាលបណ្ដោះអាសន្នបានអនុម័តការផ្អាកការវាយប្រហារទៅលើប្រទេសជិតខាង លុះត្រាតែមានការវាយប្រហារលើអ៊ីរ៉ង់មកពីប្រទេសទាំងនោះ។

ទន្ទឹមនឹងការប្រកាសនេះ លោកក៏បានសុំទោសដល់បណ្តាប្រទេសឈូងសមុទ្រអារ៉ាប់ផងដែរ។ លោកបានថ្លែងលើទូរទស្សន៍រដ្ឋប្រធានាធិបតីអ៊ីរ៉ង់ថា៖ «ខ្ញុំផ្ទាល់សូមអភ័យទោសចំពោះប្រទេសជិតខាងដែលត្រូវបានវាយប្រហារដោយអ៊ីរ៉ង់។ យើងមិនមានបំណងវាយប្រហារប្រទេសជិតខាងទេ។ ដូចដែលខ្ញុំបាននិយាយម្តងហើយម្តងទៀតថា ពួកគេជាបងប្អូនរបស់យើង»។

លោក Pezeshkian បានបន្ថែមថា ក្រុមប្រឹក្សាភិបាលដែលមានសមាជិកបីរូប ដែលគ្រប់គ្រងបណ្តោះអាសន្នអ៊ីរ៉ង់ បានប្រាប់កងកម្លាំងប្រដាប់អាវុធថា ចាប់ពីពេលនេះតទៅ មិនគួរមានការវាយប្រហារលើប្រទេសជិតខាង ឬមីស៊ីលវាយប្រហារឡើយ លុះត្រាតែពួកគេចង់វាយប្រហារអ៊ីរ៉ង់ពីសំណាក់ប្រទេសទាំងនោះ។

លោក Pezeshkian បានបន្ថែមថា៖ «ខ្ញុំគិតថាយើងត្រូវដោះស្រាយបញ្ហានេះដោយការទូត ជាជាងការប្រយុទ្ធ និងមានបញ្ហាជាមួយប្រទេសជិតខាង»។

យោងតាមលោក Brad Cooper ឧត្តមនាវីឯកកងទ័ពជើងទឹក ប្រធានបញ្ជាការកណ្តាលសហរដ្ឋអាមេរិក ដែលត្រួតពិនិត្យប្រតិបត្តិការនៅមជ្ឈិមបូព៌ា អ៊ីរ៉ង់បានវាយប្រហារប្រទេសចំនួន១២ ហើយ ដោយកំណត់គោលដៅដោយចេតនាលើជនស៊ីវិលនៅទូទាំងមជ្ឈិមបូព៌ា។

មន្ត្រីអេមីរ៉ាតអារ៉ាប់រួមបាននិយាយថា ប្រទេសនេះត្រូវបានវាយប្រហារដោយយន្តហោះគ្មានមនុស្សបើកចំនួន ១១២ គ្រឿងកាលពីថ្ងៃសុក្រ។ ក្នុងនោះប្រព័ន្ធការពារដែនអាកាសបានស្ទាក់ចាប់បាន ១០៩ គ្រឿង ខណៈបីគ្រឿងបានធ្លាក់ក្នុងទឹកដីរបស់ប្រទេស នេះបើយោងតាមក្រសួងការពារជាតិអារ៉ាប់រួម។

ចំណែក មន្ត្រីនៅក្នុងប្រទេសបារ៉ែនបាននិយាយថា កងកម្លាំងរបស់ខ្លួនបានបំផ្លាញមីស៊ីលចំនួន ៧៨ គ្រាប់ និងយន្តហោះគ្មានមនុស្សបើកចំនួន ១៤៣ គ្រឿង ដែលបានកំណត់គោលដៅលើព្រះរាជាណាចក្រនេះ ចាប់តាំងពីការចាប់ផ្តើមនៃការឈ្លានពានដ៏គ្រោះថ្នាក់ នេះបើយោងតាមសេចក្តីថ្លែងការណ៍មួយពីអគ្គបញ្ជាការនៃកងកម្លាំងការពារជាតិបារ៉ែន៕