By 
ភ្នំពេញ – ក្រសួងការងារ និងបណ្ដុះបណ្ដាលវិជ្ជាជីវៈ កំពុងរៀបចំចុះកិច្ចព្រមព្រៀងជាមួយប្រទេសលុចសំបួ ដើម្បីអភិវឌ្ឍជំនាញយុវជននៅតំបន់ដាច់ស្រយាលក្នុងខេត្តស្ទឹងត្រែង និងរតនគិរី។
កាលពីថ្ងៃទី៦ មីនា ២០២៦ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបពិភាក្សាជាមួយលោក ថូមាស់ ឡាម៉ា ភារធារីស្ដីទីនៃស្ថានទូតលុចសំបួ ដើម្បីពង្រឹងកិច្ចសហប្រតិបត្តិការលើការអភិវឌ្ឍជំនាញវិជ្ជាជីវៈ។
កិច្ចសហការនេះផ្តោតលើការបណ្តុះបណ្តាលជំនាញក្នុងវិស័យកែច្នៃផលិតផលកសិកម្ម ទេសចរណ៍ បដិសណ្ឋារកិច្ច និងភាសាអន្តរជាតិ តាមរយៈកម្មវិធី TVET។ គម្រោងនេះមានគោលបំណងជំរុញឱ្យមានភាពស្មើគ្នានៃការអភិវឌ្ឍរវាងទីក្រុង និងតំបន់ដាច់ស្រយាល។
ភាគីទាំងពីរបានឯកភាពគ្នាលើការដាក់ឱ្យដំណើរការគម្រោង និងគ្រោងចុះកិច្ចព្រមព្រៀងជាផ្លូវការនៅចុងឆ្នាំ២០២៦។ កិច្ចសហការនេះស្របនឹងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា ដើម្បីចាកចេញពីឋានៈប្រទេសអភិវឌ្ឍន៍តិចតួចនៅឆ្នាំ២០២៩។
