By រាជធានីភ្នំពេញ៖ ក្នុងឱកាសខួបលើកទី១១៥នៃទិវាអន្តរជាតិនារី ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានប្រទានព្រះរាជសារដល់បងប្អូនជនរួមជាតិថា សន្តិភាពគឺជាកត្តាសំខាន់បង្កើតបរិយាកាសឱ្យស្ត្រីនិងក្មេងស្រីអាចចូលរួមពេញលេញនិងទទួលភាគលាភស្មើភាពពីកិច្ចអភិវឌ្ឍន៍។
យោងតាមព្រះរាជសារ ព្រះអង្គមានព្រះបន្ទូលថា៖ “ទូលព្រះបង្គំជាខ្ញុំ ខ្ញុំព្រះករុណា ខ្ញុំ រួមជាមួយព្រះសង្ឃ និងបងប្អូនជនរួមជាតិទាំងអស់ មានហឫទ័យសោមនស្សរីករាយ សូមចូលរួមអបអរសាទរជាមួយស្ត្រីនៅទូទាំងព្រះរាជាណាចក្រកម្ពុជា និងពិភពលោក ក្នុងឱកាសខួបលើកទី១១៥ទិវាអន្តរជាតិនារី។”
ព្រះអង្គបានបន្តថា ការលើកកម្ពស់សិទ្ធិ សមភាព និងបង្កើនភាពអង់អាចដល់ស្ត្រីនិងក្មេងស្រី មិនត្រឹមតែជាអាទិភាពប៉ុណ្ណោះទេ ប៉ុន្តែជាភាពចាំបាច់សមស្របតាមកាលៈទេសៈ និងជាកត្តាសំខាន់ក្នុងការសម្រេចសមភាពយេនឌ័រ។
“ស្ត្រីជាតួអង្គតំណាងឱ្យអាណាព្យាបាលភាព ភាពអង់អាច សេចក្តីអំណត់ វីរិយភាព ភាពជោគជ័យ ការតស៊ូ និងលះបង់” ព្រះអង្គបានបញ្ជាក់។ “ស្ត្រីជាឆ្អឹងខ្នងសេដ្ឋកិច្ចជាតិ”។
ព្រះមហាក្សត្របានបន្ថែមថា៖ “យើងទាំងអស់គ្នាចាំបាច់ត្រូវទទួលស្គាល់ គាំទ្រ ការពារ ថែរក្សា និងផ្តល់តម្លៃដល់សន្តិភាព។ សន្តិភាពបានបង្កើតបរិយាកាសឱ្យស្ត្រីនិងក្មេងស្រីបានចូលរួមដោយពេញលេញ។”
ព្រះអង្គក៏បានលើកឡើងពីស្ថានភាពជនភៀសសឹកតាមបណ្តោយព្រំដែនកម្ពុជា-ថៃ ដែលស្ត្រីបានដើរតួនាទីសំខាន់ក្នុងការថែរក្សាគ្រួសារ។ ព្រះអង្គបានថ្លែងអំណរគុណដល់ស្ថាប័នជាតិ និងអន្តរជាតិដែលបានជួយឧបត្ថម្ភ។
ព្រះអង្គបានអរគុណដល់រាជរដ្ឋាភិបាលកម្ពុជា ក្រសួងកិច្ចការនារី និងស្ថាប័នពាក់ព័ន្ធផ្សេងៗ ដែលបានខិតខំដោះស្រាយគម្លាតយេនឌ័រ និងលើកកម្ពស់សិទ្ធិស្ត្រី។ ព្រះអង្គបានសង្កត់ធ្ងន់លើការចូលរួមរបស់ស្ត្រីក្នុងវិស័យឌីជីថល វិទ្យាសាស្ត្រ បច្ចេកវិទ្យា និងសិល្បៈ។
ព្រះរាជសារនេះត្រូវបានផ្សព្វផ្សាយក្នុងឱកាសខួបលើកទី១១៥នៃទិវាអន្តរជាតិនារី ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ ដើម្បីរួមគ្នាបង្កើនភាពអង់អាចដល់ស្ត្រីនិងក្មេងស្រី»។
អត្ថបទសរសេរដោយ៖ អ៊ាង ប៊ុនរិទ្ធ
កែសម្រួលដោយ៖ ធីតា
