By ភ្នំពេញ – រដ្ឋបាលរាជធានីភ្នំពេញបានបន្តធ្វើការត្រួតពិនិត្យតម្លៃប្រេងឥន្ធនៈនៅទូទាំងរាជធានី ដោយផាកពិន័យស្ថានីយប្រេងមួយចំនួនដែលលក់លើសតម្លៃដែលក្រសួងពាណិជ្ជកម្មបានកំណត់។
ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញ ក្រុមការងាររដ្ឋបាលខណ្ឌពោធិ៍សែនជ័យ ដឹកនាំដោយលោក សក់ ច័ន្ទកញ្ញារិទ្ធ បានចុះត្រួតពិនិត្យស្ថានីយប្រេងឥន្ធនៈ “សន្ដិភាព” នៅមហាវិថីសហព័ន្ធរុស្ស៊ី កាលពីថ្ងៃទី០៨ ខែមីនា ឆ្នាំ២០២៦។
លទ្ធផលនៃការត្រួតពិនិត្យបានរកឃើញថា ស្ថានីយនេះបានលក់ប្រេងឥន្ធនៈលើសតម្លៃដែលក្រសួងពាណិជ្ជកម្មបានកំណត់។ ក្រុមការងារបានផាកពិន័យទីតាំងនេះចំនួន ៤,០០០,០០០រៀល និងបង្ខំឱ្យធ្វើកិច្ចសន្យាកែតម្រូវតាមច្បាប់។
រដ្ឋបាលរាជធានីភ្នំពេញបានអំពាវនាវដល់ប្រជាពលរដ្ឋទាំងអស់ឱ្យរួមគ្នារក្សាសណ្ដាប់ធ្នាប់សង្គម សាមគ្គីគ្នាក្នុងគ្រាលំបាក និងចៀសវាងការឆក់ឱកាសកេងចំណេញលើអ្នកប្រើប្រាស់។
ការត្រួតពិនិត្យនេះគឺជាផ្នែកមួយនៃយុទ្ធសាស្ត្ររបស់រដ្ឋបាលរាជធានីក្នុងការការពារប្រជាពលរដ្ឋពីការកេងប្រវ័ញ្ចតម្លៃ និងធានានូវប្រក្រតីភាពទីផ្សារប្រេងឥន្ធនៈ។
