By ភ្នំពេញ – ក្រសួងធនធានទឹក និងឧតុនិយមបានចេញប្រកាសព័ត៌មានអាកាសធាតុថ្មីបំផុត ដោយព្យាករថា ប្រទេសកម្ពុជានឹងប្រឈមមុខនឹងអាកាសធាតុក្ដៅស្ងួតពេញបីថ្ងៃចាប់ពីថ្ងៃទី៩ ដល់ថ្ងៃទី១១ ខែមីនា ឆ្នាំ២០២៦។
របបខ្យល់មូសុងឦសានដែលកំពុងបក់ពីសមុទ្រចិនខាងត្បូង អាងទន្លេមេគង្គ និងសមុទ្រកម្ពុជា បានបង្កើតឥទ្ធិពលយ៉ាងខ្លាំងលើអាកាសធាតុទូទាំងប្រទេស។
សម្រាប់តំបន់វាលទំនាប រួមមានរាជធានីភ្នំពេញ និងខេត្តជាច្រើនដូចជា បន្ទាយមានជ័យ បាត់ដំបង ពោធិ៍សាត់ សៀមរាប ព្រៃវែង កំពង់ធំ កំពង់ឆ្នាំង កំពង់ចាម ត្បូងឃ្មុំ កណ្តាល តាកែវ និងស្វាយរៀង សីតុណ្ហភាពនឹងមានពី២៣°C ដល់៣៥°C។ ខ្យល់នឹងបក់មកពីទិសឦសាននិងទិសបូព៌ដោយមានល្បឿនមធ្យម ៣ម៉ែត្រ/វិនាទី។
តំបន់ខ្ពង់រាបដូចជា កំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរភ្នំក្រវាញ សីតុណ្ហភាពនឹងមានពី២២°C ដល់៣៤°C។ ខ្យល់បក់មកពីទិសឧត្តរ និងទិសឦសានដោយមានល្បឿនមធ្យម ២ម៉ែត្រ/វិនាទី។
សម្រាប់តំបន់មាត់សមុទ្ររួមមាន កោះកុង ព្រះសីហនុ កំពត កែប និងជួរភ្នំបូកគោ សីតុណ្ហភាពនឹងមានពី២៣°C ដល់៣៥°C។ ខ្យល់បក់មកពីទិសនិរតី និងទិសអាគ្នេយ៍ដោយមានល្បឿនមធ្យម ៣ម៉ែត្រ/វិនាទី។ រលកសមុទ្រនឹងមានកម្ពស់ពី០,៥០ម៉ែត្រ ដល់១,០០ម៉ែត្រ។
អាកាសធាតុនៅទូទាំងប្រទេសនឹងមិនមានភ្លៀងធ្លាក់ទេក្នុងរយៈពេលបីថ្ងៃនេះ។ ក្រសួងធនធានទឹក និងឧតុនិយមបានផ្ដល់អនុសាសន៍ឱ្យប្រជាពលរដ្ឋត្រៀមខ្លួនសម្រាប់អាកាសធាតុក្ដៅស្ងួត និងរក្សាសុខភាពឱ្យបានល្អ។
