រដ្ឋបាលស្វាយរៀងចុះដោះស្រាយវិវាទឈ្នួលកម្មករសំណង់នៅក្រុងបាវិត

ខេត្តស្វាយរៀង – អាជ្ញាធរខេត្តស្វាយរៀងបានចុះដោះស្រាយវិវាទការងារបន្ទាន់ បន្ទាប់ពីក្រុមហ៊ុនសាងសង់ខកខានបើកប្រាក់ឈ្នួលជាលើកទី២ដល់កម្មករនៅក្រុងបាវិត។

ក្រោមការដឹកនាំរបស់លោក ប៉េង ពោធិ៍សា អភិបាលខេត្តស្វាយរៀង ក្រុមការងារចម្រុះដឹកនាំដោយលោក ម៉ែន អេង អភិបាលរង បានចុះទៅការដ្ឋានសំណង់អគារក្រុមហ៊ុន រេឌាន ភើល អិនវេសមេន លីមីធីត នៅភូមិថ្នល់កែង សង្កាត់បាទី ក្រុងបាវិត ដើម្បីដោះស្រាយវិវាទការងាររវាងភាគីកម្មករ អ្នកម៉ៅការ និងភាគីម្ចាស់ការដ្ឋាន។

បញ្ហានេះកើតឡើងដោយសារម្ចាស់សំណង់ត្រូវសមត្ថកិច្ចចាប់ខ្លួនរួចបណ្តេញចេញទៅប្រទេសដើមវិញ ហើយក្រុមហ៊ុនទទួលការសាងសង់ (ឃ្យូ.អេស ដេខ័ររេសិន អេនជឺនារីង ឯ.ក) ខ្វះលទ្ធភាពទូទាត់ប្រាក់ឈ្នួល។

លោក អ៊ូ សុខឿន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត បានបញ្ជាក់ថា អាជ្ញាធរបានផ្តល់កំហិតចុងក្រោយរយៈពេល១៥ថ្ងៃ ដើម្បីឱ្យភាគីពាក់ព័ន្ធស្វែងរកថវិកាមកបើកជូនកម្មករ។ ប្រសិនបើផុតកំណត់នេះ ក្រុមហ៊ុននៅតែមិនមានលទ្ធភាព អាជ្ញាធរនឹងបន្តអនុវត្តនីតិវិធីច្បាប់តឹងរ៉ឹងបំផុត។

លោកអភិបាលរងខេត្តបានសង្កត់ធ្ងន់ថា រដ្ឋបាលខេត្តស្វាយរៀងនឹងតាមដានរឿងនេះរហូតដល់មានដំណោះស្រាយចុងក្រោយ។ លោកបានផ្តាំផ្ញើឱ្យកម្មកររក្សាភាពស្ងប់ស្ងាត់ និងជឿជាក់លើការងាររបស់មន្ត្រីជំនាញ ដែលកំពុងធ្វើការយ៉ាងសកម្មដើម្បីធានាថា “ញើសឈាមរបស់កម្មករ ត្រូវតែទទួលបានការតបស្នងដោយយុត្តិធម៌”។

សកម្មភាពនេះមិនត្រឹមតែជាការដោះស្រាយវិវាទការងារប៉ុណ្ណោះទេ ប៉ុន្តែវាគឺជាការឆ្លុះបញ្ចាំងពីការអនុវត្តគោលនយោបាយរបស់រាជរដ្ឋាភិបាល ក្នុងការគិតគូរពីសុខទុក្ខ និងអត្ថប្រយោជន៍របស់កម្មករនិយោជិតជាអាទិភាពបំផុត។

ជាកិច្ចបញ្ចប់ លោកអភិបាលរងខេត្តបានអំពាវនាវឱ្យកម្មករ-កម្មការិនីរក្សាភាពស្ងប់ស្ងាត់ និងសហការជាមួយអាជ្ញាធរ ខណៈដែលក្រុមការងារកំពុងរុញច្រាននីតិវិធីដោះស្រាយឱ្យបានឆាប់រហ័សបំផុតតាមដែលអាចធ្វើទៅបាន។