អាជ្ញាធរចុះត្រួតពិនិត្យទីតាំង ១៣៤កន្លែង ក្នុងភ្នំពេញ រកឃើញជនបរទេសខុសច្បាប់ជាង ៥០០នាក់

ភ្នំពេញ៖ កាលពីថ្ងៃទី០៨ ខែមីនា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ បានចុះត្រួតពិនិត្យទីតាំងស្នាក់នៅចំនួន ១៣៤កន្លែង ក្នុងភូមិសាស្ត្ររាជធានីភ្នំពេញ។

ប្រតិបត្តិការទ្រង់ទ្រាយធំនេះ ធ្វើឡើងក្រោមការដឹកនាំរបស់លោកអភិបាលរងរាជធានីភ្នំពេញ ៣រូប ដោយមានការចូលរួមពីកម្លាំងស្នងការដ្ឋាននគរបាលរាជធានីភ្នំពេញ កងរាជអាវុធហត្ថរាជធានី និងអាជ្ញាធរពាក់ព័ន្ធនៅតាមមូលដ្ឋានខណ្ឌច្បារអំពៅ និងខណ្ឌពោធិ៍សែនជ័យ។

ជាលទ្ធផល កម្លាំងអាជ្ញាធរចម្រុះបានត្រួតពិនិត្យលើជនបរទេសសរុប ៥៩៨នាក់ (ស្រី ១៦៧នាក់) ដោយក្នុងចំណោមជនបរទេសមួយចំនួន ត្រូវបានរកឃើញថាមានពាក់ព័ន្ធបទល្មើសគ្រឿងញៀន ស្នាក់នៅដោយខុសច្បាប់ និងលបលួចឆ្លងដែនមកកម្ពុជាដោយខុសច្បាប់។

ជនសង្ស័យជាជនបរទេស និងវត្ថុតាងពាក់ព័ន្ធ ត្រូវបានបញ្ជូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីច្បាប់។

គួរកត់សម្គាល់ថា ក្នុងការពិនិត្យរដ្ឋបាលនេះ កម្លាំងអាជ្ញាធរមានសមត្ថកិច្ចពុំបានរកឃើញថាមានទីតាំងណាមួយ ឬជនបរទេសណាម្នាក់ ជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scams) នោះឡើយ។

ប្រតិបត្តិការនេះបង្ហាញពីការតស៊ូមតិរបស់អាជ្ញាធរកម្ពុជាក្នុងការប្រយុទ្ធប្រឆាំងនឹងបទល្មើសឆ្លងដែន និងគ្រឿងញៀន ដើម្បីធានាសុវត្ថិភាពសាធារណៈ និងសណ្តាប់ធ្នាប់សង្គម។

បច្ចុប្បន្ន ករណីនេះកំពុងស្ថិតក្រោមការស៊ើបអង្កេតបន្ថែម ដើម្បីដោះស្រាយតាមនីតិវិធីច្បាប់។