ស្វីសចោទសហរដ្ឋអាមេរិក អ៊ីស្រាអែលរំលោភច្បាប់អន្តរជាតិក្នុងការវាយប្រហារអ៊ីរ៉ង់

ភ្នំពេញ – រដ្ឋមន្ត្រីក្រសួងការពារជាតិស្វីស លោក Martin Pfister បានចេញមុខចោទប្រកាន់សហរដ្ឋអាមេរិក និងអ៊ីស្រាអែលថា បានបំពានច្បាប់អន្តរជាតិដោយធ្វើការវាយប្រហារលើប្រទេសអ៊ីរ៉ង់។

ក្នុងការសម្ភាសន៍ជាមួយកាសែត SonntagsZeitung លោក Pfister បានបញ្ជាក់យ៉ាងច្បាស់ថា៖ «ការវាយប្រហារលើអ៊ីរ៉ង់គឺជាការរំលោភលើច្បាប់អន្តរជាតិ ហើយតាមទស្សនៈរបស់យើង វាជាការរំលោភលើការហាមឃាត់ក្នុងការប្រើប្រាស់អំពើហិង្សាដោយចេតនា»។

យោងតាមអ្នកជំនាញផ្នែកច្បាប់ ការវាយប្រហារនេះមិនសមហេតុផលក្រោមធម្មនុញ្ញអង្គការសហប្រជាជាតិទេ ដោយសមាជិកអង្គការសហប្រជាជាតិត្រូវតែចៀសវាងការប្រើប្រាស់កម្លាំងដោយគ្មានការអនុញ្ញាត លើកលែងតែសកម្មភាពក្នុងការការពារខ្លួនប៉ុណ្ណោះ។

លោករដ្ឋមន្ត្រីស្វីសបានអំពាវនាវដល់ភាគីទាំងអស់ឱ្យបញ្ឈប់ការប្រយុទ្ធ ដើម្បីការពារអាយុជីវិតជនស៊ីវិល និងអនុវត្តតាមគោលការណ៍អន្តរជាតិ។

«សហរដ្ឋអាមេរិក និងអ៊ីស្រាអែលបានវាយប្រហារអ៊ីរ៉ង់ពីលើអាកាស ហើយការធ្វើដូច្នេះគឺជាការរំលោភច្បាប់អន្តរជាតិ» លោក Pfister បានបន្ថែម។

ការចេញមុខរបស់ស្វីសនេះកើតឡើងក្នុងពេលដែលអន្តរជាតិកំពុងព្រួយបារម្ភអំពីស្ថានភាពតានតឹងនៅតំបន់មជ្ឈិមបូព៌ា និងការបំពានច្បាប់អន្តរជាតិដោយប្រទេសមហាអំណាច។