By ភ្នំពេញ៖ នារសៀលថ្ងៃទី០៩ មីនា ២០២៦ លោក ថេង សុថុល អភិបាលខណ្ឌ៧មករា បានដឹកនាំកិច្ចប្រជុំពិសេស ដើម្បីបង្កើនប្រសិទ្ធភាពការទប់ស្កាត់បទល្មើសអនឡាញ (Online Scam) ដែលកំពុងគំរាមកំហែងសន្តិសុខប្រជាពលរដ្ឋ។
កិច្ចប្រជុំដ៏សំខាន់នេះបានប្រមូលផ្តុំមន្ត្រីជាន់ខ្ពស់ពីគ្រប់ផ្នែក រួមមានអភិបាលរង អធិការនគរបាល មេបញ្ជាការកងរាជអាវុធហត្ថ និងចៅសង្កាត់ទាំង៨នាក់ ដើម្បីរកវិធានការបង្ក្រាបបទល្មើសឌីជីថល។
លោកអភិបាលបានជំរុញឱ្យមានការសហការយ៉ាងជិតស្និទ្ធរវាងអាជ្ញាធរមូលដ្ឋាន កម្លាំងសន្តិសុខ និងប្រជាពលរដ្ឋ ដើម្បីតាមដានសកម្មភាពសង្ស័យ។ លោកបានបញ្ជាឱ្យពង្រឹងការត្រួតពិនិត្យទីតាំងស្នាក់នៅប្រមូលផ្តុំ អគារជួល និងកន្លែងដែលមានជនបរទេសស្នាក់នៅច្រើន។
“យើងបានពិនិត្យទីតាំង៨៧កន្លែងក្នុងខណ្ឌ រួមមានអាគារ ខុនដូ អាផានមិន និងសណ្ឋាគារ។ ទោះបីជាមិនទាន់រកឃើញបទល្មើសក៏ដោយ ក៏យើងនឹងបន្តត្រួតពិនិត្យជាប្រចាំ” លោកថេង សុថុលបានបញ្ជាក់។
យ៉ាងណាក៏ដោយ លោកបានដាស់តឿនពីគ្រោះថ្នាក់នៃបទល្មើសអនឡាញ និងតម្រូវឱ្យមានការផ្សព្វផ្សាយព័ត៌មានដល់ប្រជាពលរដ្ឋឱ្យបានទូលំទូលាយ ដើម្បីការពារពួកគេមិនឱ្យធ្លាក់ក្នុងអន្ទាក់ឆបោកតាមបណ្តាញសង្គម។
ចៅសង្កាត់ទាំង៨បានឡើងប្តេជ្ញាចិត្តអនុវត្តតាមបទបញ្ជាដោយតឹងរ៉ឹង និងសហការយ៉ាងជិតស្និទ្ធជាមួយអាជ្ញាធរខណ្ឌ ដើម្បីធានាឱ្យខណ្ឌ៧មករានៅតែជាតំបន់សុវត្ថិភាពសម្រាប់ប្រជាពលរដ្ឋ។
កិច្ចប្រជុំនេះបានបង្ហាញពីភាពច្បាស់លាស់នៃគោលនយោបាយរបស់អាជ្ញាធរក្នុងការប្រយុទ្ធប្រឆាំងនឹងបទល្មើសឌីជីថល ដោយផ្តោតលើការការពារសន្តិសុខសុវត្ថិភាពប្រជាពលរដ្ឋជាអាទិភាព។
ដោយ៖ រ៉ារ៉ា
