ជប៉ុនចាប់ផ្តើមដាក់ពង្រាយមីស៊ីលចម្ងាយឆ្ងាយដំបូងគេនៅភាគនិរតី បណ្តាលឱ្យអ្នកស្រុកតវ៉ា

ប្រទេសជប៉ុនបានចាប់ផ្តើមដាក់ពង្រាយមីស៊ីលចម្ងាយឆ្ងាយផលិតក្នុងស្រុកជាលើកដំបូងនៅតំបន់ភាគនិរតី ដោយមានគោលបំណងបង្កើនសមត្ថភាពយោធាឆ្លើយតបទៅនឹងបញ្ហាប្រឈមក្នុងតំបន់។

យោងតាមអាជ្ញាធរជប៉ុន មីស៊ីលប្រភេទ Type-12 ដែលអាចបាញ់បានចម្ងាយរហូតដល់ 1,000 គីឡូម៉ែត្រ នឹងត្រូវដាក់ពង្រាយនៅជំរំ Kengun ខេត្ត Kumamoto នៅចុងខែមីនានេះ។ លោក Minoru Kihara ប្រធានលេខាធិការគណៈរដ្ឋមន្ត្រីបានបញ្ជាក់ពីដំណើរការនេះ ប៉ុន្តែមិនបានផ្តល់ព័ត៌មានលម្អិតទេ។

ការដាក់ពង្រាយមីស៊ីលនេះបានជំរុញឱ្យមានការតវ៉ាពីអ្នកស្រុកក្នុងតំបន់ ដែលពលរដ្ឋរាប់សិបនាក់បានឈរតវ៉ាខាងក្រៅជំរំយោធា ដោយស្រែកថា៖ «សូមបញ្ឈប់ការដាក់ពង្រាយមីស៊ីលចម្ងាយឆ្ងាយ»។

លោក Takashi Kimura អភិបាលខេត្ត Kumamoto បានបង្ហាញការខកចិត្តយ៉ាងខ្លាំង ដោយបញ្ជាក់ថា៖ «ខេត្តមិនទទួលបានការជូនដំណឹងទេ។ វាពិតជាការខកចិត្តយ៉ាងខ្លាំង ដែលយើងបានដឹងរឿងនេះតាមរយៈប្រព័ន្ធផ្សព្វផ្សាយទៅវិញ»។

មីស៊ីល Type-12 ត្រូវបានអភិវឌ្ឍនិងផលិតដោយក្រុមហ៊ុន Mitsubishi Heavy Industries ដែលជាការពង្រីកសមត្ថភាពយ៉ាងសំខាន់ពីមីស៊ីលមុនដែលមានចម្ងាយត្រឹមតែ 200 គីឡូម៉ែត្រ។ ការដាក់ពង្រាយនេះគឺជាផ្នែកមួយនៃផែនការបង្កើនសមត្ថភាពយោធារបស់ជប៉ុននៅតំបន់ភាគនិរតី។