By អឺរ៉ុបបានក្លាយជាអ្នកនាំចូលអាវុធធំជាងគេបំផុតនៅលើពិភពលោកក្នុងរយៈពេល 5 ឆ្នាំចុងក្រោយនេះ ដោយបង្កើនការនាំចូលអាវុធជាង 3 ដង ដោយសារតែការគំរាមកំហែងពីរុស្ស៊ី និងការថយចុះទំនុកចិត្តចំពោះសន្តិសុខអាមេរិក។
យោងតាមរបាយការណ៍ថ្មីពីវិទ្យាស្ថានស្រាវជ្រាវសន្តិភាពអន្តរជាតិស្តុកខុម (SIPRI) ដែលចេញផ្សាយនៅថ្ងៃចន្ទនេះ បង្ហាញថាអឺរ៉ុបមានចំណែក 33% នៃការនាំចូលអាវុធសកល កើនឡើងពីត្រឹម 12% ក្នុងរយៈពេល 5 ឆ្នាំមុន។
លោក Mathew George នាយកកម្មវិធីផ្ទេរអាវុធនៃ SIPRI បានលើកឡើងថា៖ «ការកើនឡើងយ៉ាងខ្លាំងនៃលំហូរអាវុធទៅកាន់រដ្ឋនៅអឺរ៉ុប បានជំរុញឱ្យការផ្ទេរអាវុធសកលកើនឡើងជិត 10%»។
កត្តាចម្បងដែលនាំឱ្យមានការកើនឡើងនេះគឺការផ្គត់ផ្គង់អាវុធដល់អ៊ុយក្រែនក្នុងការប្រឆាំងនឹងការឈ្លានពានរបស់រុស្ស៊ី និងការកសាងយោធាឡើងវិញបន្ទាប់ពីការវិនិយោគមិនគ្រប់គ្រាន់អស់រយៈពេលជាច្រើនទសវត្សរ៍។
ទោះបីជាមានការជំរុញផលិតកម្មក្នុងស្រុកក៏ដោយ ប្រទេសនៅអឺរ៉ុបនៅតែបន្តបង្កើនការទិញអាវុធរបស់សហរដ្ឋអាមេរិក ជាពិសេសយន្តហោះប្រយុទ្ធ និងប្រព័ន្ធការពារដែនអាកាសរយៈចម្ងាយឆ្ងាយ។
លោក Pieter Wezeman អ្នកស្រាវជ្រាវជាន់ខ្ពស់របស់ SIPRI បានពន្យល់ថា៖ «ពួកគេនឹងជំនួសអ្វីដែលបានប្រើជាមុនសិន ប៉ុន្តែពួកគេក៏នឹងពិចារណាទិញឧបករណ៍បន្ថែមទៀត ដើម្បីការពារខ្លួនឱ្យបានល្អជាងអ្វីដែលពួកគេអាចធ្វើបានឥឡូវនេះ»។
របាយការណ៍នេះក៏បង្ហាញផងដែរថា ការនាំចូលអាវុធដោយរដ្ឋមជ្ឈិមបូព៌ាបានធ្លាក់ចុះ 13% ទោះបីជាប្រទេសអារ៉ាប៊ីសាអូឌីត និងកាតាស្ថិតក្នុងចំណោមអ្នកទិញកំពូលទាំងបួនក៏ដោយ។
