By ខេត្តព្រះសីហនុ – សមត្ថកិច្ចខេត្តព្រះសីហនុបានធ្វើប្រតិបត្តិការបង្ក្រាបករណីឆបោកតាមអនឡាញ (Scam Online) និងជនបរទេសស្នាក់នៅខុសច្បាប់ នៅរសៀលថ្ងៃទី៩ ខែមីនា ឆ្នាំ២០២៦។
ប្រតិបត្តិការនេះត្រូវបានអនុវត្តតាមបទបញ្ជារបស់ឯកឧត្តម ម៉ាងស៊ីណេត អភិបាលខេត្ត ដោយគណៈបញ្ជាការឯកភាពខេត្តព្រះសីហនុ ដឹកនាំដោយលោក មីន កុម្ភៈ អភិបាលរងខេត្ត។ ការសម្របសម្រួលនីតិវិធីត្រូវបានធ្វើឡើងដោយលោក ឆាយ សុត្រា ព្រះរាជអាជ្ញារង អមសាលាដំបូងខេត្ត។
ប្រតិបត្តិការបានចុះទៅកាន់ទីតាំងបុរីស៊ីឡុងប៊េ ស្ថិតនៅភូមិអុង សង្កាត់រាម ក្រុងកំពង់សោម ខេត្តព្រះសីហនុ។ លទ្ធផលប្រតិបត្តិការបានឃាត់ខ្លួនជនបរទេសចំនួន ៧៧ នាក់ កុំព្យូទ័រ ៧៧ គ្រឿង និងទូរស័ព្ទមួយចំនួនទៀត។
បច្ចុប្បន្ន ជនបរទេស និងវត្ថុតាងទាំងអស់ត្រូវបានសមត្ថកិច្ចបញ្ជូនទៅស្នងការដ្ឋានដើម្បីបន្តនីតិវិធីតាមច្បាប់។ នេះជាសកម្មភាពសំខាន់ក្នុងការថែរក្សាសន្តិសុខ សណ្តាប់ធ្នាប់សាធារណៈ និងការអនុវត្តច្បាប់យ៉ាងតឹងរ៉ឹង។
ការចុះប្រតិបត្តិការនេះស្របទៅនឹងការអនុវត្តខ្លឹមសារអនុក្រឹត្យលេខ ០៣ របស់រាជរដ្ឋាភិបាល ដែលផ្តោតលើការបង្ក្រាបបទល្មើសឆបោកតាមអនឡាញ និងការគ្រប់គ្រងជនបរទេសដែលស្នាក់នៅខុសច្បាប់។
សារច្បាស់លាស់មួយត្រូវបានផ្ញើទៅកាន់ក្រុមជនល្មើសថា សមត្ថកិច្ចកម្ពុជាមិនអត់ឱនចំពោះសកម្មភាពខុសច្បាប់ទាំងនេះឡើយ។ ការអនុវត្តច្បាប់យ៉ាងតឹងរ៉ឹងនឹងបន្តដើម្បីការពារសន្តិសុខសាធារណៈ។
ដោយ៖ ចន្ទ លីហ្សា
