By ភ្នំពេញ – លោក ជាម យៀប អនុប្រធានទី១នៃរដ្ឋសភាកម្ពុជា បានស្នើសុំឱ្យរដ្ឋាភិបាលសាធារណរដ្ឋកូរ៉េ(កូរ៉េខាងត្បូង) ពិនិត្យឡើងវិញលើលក្ខខណ្ឌនៃការលក់យន្តហោះចម្បាំងឱ្យទៅប្រទេសថៃ ដើម្បីធានាសន្តិភាពក្នុងតំបន់។
ការស្នើសុំនេះត្រូវបានធ្វើឡើងក្នុងអំឡុងពេលទទួលជួបពិភាក្សាការងារជាមួយគណៈប្រតិភូរដ្ឋសភានៃសាធារណរដ្ឋកូរ៉េ ដែលដឹកនាំដោយលោក យ៉ូន ហូដុក សមាជិករដ្ឋសភា និងជាប្រធានក្រុមមិត្តភាពសភាកូរ៉េ-កម្ពុជា នាថ្ងៃទី៩ ខែមីនា ឆ្នាំ២០២៦។
លោក ជាម យៀប បានបញ្ជាក់យ៉ាងច្បាស់ថា៖ “ជំហរជាដាច់ខាតរបស់កម្ពុជាគឺការកសាងសន្តិភាពជាមួយប្រទេសជិតខាងទាំងអស់ រួមទាំងប្រទេសថៃ។ ទោះជាយ៉ាងណាក៏ដោយ យើងបដិសេធដាច់ខាតចំពោះរាល់សកម្មភាពឈ្លានពាន និងការប្រើប្រាស់កម្លាំងអាវុធមកលើទឹកដីរបស់យើង។”
អនុប្រធានទី១រដ្ឋសភាបានសង្កត់ធ្ងន់ថា ការពិនិត្យឡើងវិញលើលក្ខខណ្ឌលក់យន្តហោះចម្បាំងគឺជាវិធានការចាំបាច់ ដើម្បីកុំឱ្យអាវុធទាំងនោះក្លាយជាឧបករណ៍នៃការឈ្លានពាន និងដើម្បីរួមចំណែករក្សាសន្តិភាពនៅក្នុងតំបន់អាស៊ីអាគ្នេយ៍។
ការប្រជុំនេះបានពិភាក្សាលើផ្លូវយុទ្ធសាស្ត្រក្នុងការពង្រឹងទំនាក់ទំនងសន្តិភាព និងកិច្ចសហប្រតិបត្តិការរវាងប្រទេសទាំងពីរ ដោយផ្តោតលើសារៈសំខាន់នៃការធានាឱ្យមានស្ថិរភាពក្នុងតំបន់។
