By សេអ៊ូល – ប្រធានាធិបតីកូរ៉េខាងត្បូង លី ជេម្យុង បានបញ្ជាក់យ៉ាងច្បាស់នៅថ្ងៃអង្គារទី១០មីនា ថាលោកមិនមានសមត្ថភាពក្នុងការបញ្ឈប់សហរដ្ឋអាមេរិកពីការដាក់ពង្រាយអាវុធមួយចំនួនពីទឹកដីកូរ៉េទៅកាន់តំបន់មជ្ឈិមបូព៌ា។
ការប្រកាសនេះមកបន្ទាប់ពីមានព័ត៌មានថា ប្រព័ន្ធការពារមីស៊ីល Patriot របស់អាមេរិកដែលមានមូលដ្ឋាននៅកូរ៉េខាងត្បូង កំពុងត្រូវបានផ្លាស់ប្តូរទៅកាន់តំបន់ជម្លោះនៅមជ្ឈិមបូព៌ា។
ក្នុងកិច្ចប្រជុំគណៈរដ្ឋមន្ត្រី លោកលីបានពន្យល់ថា៖ “ដោយសារតែភាពតានតឹងថ្មីៗនេះ ទាក់ទងនឹងការដឹកជញ្ជូនអាវុធរបស់កងទ័ពអាមេរិកចេញពីប្រទេសយើង យើងមិនស្ថិតក្នុងទីតាំងដើម្បីទាមទារការហាមឃាត់នេះទេ។ អាមេរិកមិនចាំបាច់ស្តាប់បង្គាប់ពីយើងក្នុងការកំណត់យុទ្ធសាស្ត្ររបស់ពួកគេនោះទេ។”
ប្រធានាធិបតីកូរ៉េខាងត្បូងបានអះអាងបន្ថែមថា ការដកអាវុធមួយចំនួនរបស់អាមេរិកមិនប៉ះពាល់ដល់សមត្ថភាពការពារប្រឆាំងនឹងកូរ៉េខាងជើងឡើយ ដោយលោកបញ្ជាក់ថា សមត្ថភាពយោធារបស់កូរ៉េខាងត្បូងលើសពីប្រទេសជិតខាងឆ្ងាយណាស់។
ទោះជាយ៉ាងណា រដ្ឋមន្ត្រីការបរទេសកូរ៉េខាងត្បូង ជូ ហ្យុន បានបង្ហាញពីភាពខុសគ្នានៃទស្សនៈកាលពីថ្ងៃទី៦មីនា ដោយលើកឡើងថា អាមេរិកនិងកូរ៉េខាងត្បូងកំពុងពិភាក្សាអំពីលទ្ធភាពក្នុងការដាក់ពង្រាយឡើងវិញនូវប្រព័ន្ធការពារមីស៊ីល Patriot មួយចំនួនពីកូរ៉េទៅតំបន់មជ្ឈិមបូព៌ា។
ប្រព័ន្ធផ្សព្វផ្សាយកូរ៉េខាងត្បូងបានរាយការណ៍ថា អាវុធមីស៊ីលមួយចំនួនត្រូវបានដឹកជញ្ជូនចេញពីមូលដ្ឋានទ័ពអាកាស Osan ហើយទំនងជាត្រូវបានផ្លាស់ទៅកាន់មូលដ្ឋានទ័ពអាមេរិកនៅអារ៉ាប៊ីសាអូឌីត និងអារ៉ាប់រួម ទោះបីជាអាជ្ញាធរកូរ៉េខាងត្បូងមិនទាន់បានបញ្ជាក់ពីរបាយការណ៍ទាំងនេះក៏ដោយ។
គួរកត់សម្គាល់ថា កូរ៉េខាងត្បូងជាម្ចាស់ផ្ទះរបស់កងទ័ពអាមេរិកប្រហែល ២៨,៥០០នាក់ ដែលជាផ្នែកនៃកិច្ចព្រមព្រៀងការពាររួមប្រឆាំងនឹងកូរ៉េខាងជើងដែលមានអាវុធនុយក្លេអ៊ែរ។
អត្ថបទ៖ សាង ស្រីល័ក្ខ
