By ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈបានប្រកាសពីឱកាសការងារជាង ១១,៨០០ កន្លែងនៅខេត្តកណ្ដាល ដែលកំពុងរង់ចាំអតីតពលករត្រឡប់មកពីប្រទេសថៃ និងបងប្អូនដែលកំពុងស្វែងរកការងារធ្វើ។
តាមការប្រកាសពីក្រសួងការងារ គិតត្រឹមថ្ងៃទី៦ ខែមីនា ឆ្នាំ២០២៦ ខេត្តកណ្ដាលមានឱកាសការងារសរុបចំនួន ១១,៨២៦ កន្លែង។ ឱកាសការងារទាំងនេះស្ថិតក្នុងវិស័យឧស្សាហកម្ម និងសេវាកម្ម ដែលជាផ្នែកសំខាន់នៃការអភិវឌ្ឍសេដ្ឋកិច្ចនៅខេត្តនេះ។
ដើម្បីទទួលបានឱកាសការងារទាំងនោះ អតីតពលករត្រឡប់មកពីថៃ និងអ្នកស្វែងរកការងារអាចស្វែងរកព័ត៌មានលម្អិតតាមរយៈខិតបណ្ណការងាររបស់ក្រសួង ដែលផ្ដល់ព័ត៌មានពីលេខទំនាក់ទំនង ឈ្មោះរោងចក្រ និងវិស័យការងារ។
ក្រៅពីការទាក់ទងផ្ទាល់ជាមួយរោងចក្រ អ្នកស្វែងរកការងារក៏អាចទាក់ទងមកប្រព័ន្ធទំនាក់ទំនងបន្ទាន់លេខ ១២៩៧ ដើម្បីឱ្យក្រសួងការងារជួយសម្របសម្រួលការស្វែងរកការងារផងដែរ។
ខេត្តកណ្ដាលដែលកំពុងទទួលបានគម្រោងវិនិយោគជាបន្តបន្ទាប់ បានក្លាយជាមជ្ឈមណ្ឌលសេដ្ឋកិច្ចសំខាន់មួយ ដែលបង្កើតឱកាសការងារជាច្រើនសម្រាប់ប្រជាពលរដ្ឋកម្ពុជា។
