ពលរដ្ឋភៀសសឹក ២៧២នាក់បន្ថែមបានវិលទៅលំនៅឋានវិញ ខណៈនៅមានជាង ៤៥ពាន់នាក់ទៀតពុំទាន់អាចត្រឡប់ផ្ទះបាន

ភ្នំពេញ៖ ក្រសួងមហាផ្ទៃបានផ្តល់ព័ត៌មានថ្មីបំផុតអំពីស្ថានភាពពលរដ្ឋភៀសសឹកនៅតាមព្រំដែនកម្ពុជា-ថៃ ដោយឱ្យដឹងថា មានពលរដ្ឋចំនួន ២៧២នាក់បន្ថែមទៀត បានវិលត្រឡប់ទៅលំនៅឋានវិញហើយ ក្នុងរយៈពេល ២៤ម៉ោងចុងក្រោយនេះ។

ក្រសួងមហាផ្ទៃបានចេញសេចក្តីជូនដំណឹងនៅថ្ងៃទី១០ ខែមីនា ឆ្នាំ២០២៦ ដោយបញ្ជាក់ថា ចាប់តាំងពីកិច្ចព្រមព្រៀងឈប់បាញ់ចូលជាធរមាននៅថ្ងៃទី២៧ ខែធ្នូ ឆ្នាំ២០២៥ មក ភាគីថៃបានបន្តប្រព្រឹត្តសកម្មភាពរំលោភលើដែនអធិបតេយ្យកម្ពុជា ទោះបីជាមិនមានការបាញ់គ្នាក៏ដោយ។

តាមរបាយការណ៍ចុងក្រោយបង្អស់៖

១. ស្ថានភាពពលរដ្ឋភៀសសឹក៖ ក្នុងចំណោមពលរដ្ឋភៀសសឹកសរុបជាង ៦៤០,០០០នាក់ មានជាង ៦០០,០០០នាក់ ឬ ៩៣% បានវិលត្រឡប់ទៅលំនៅឋានវិញហើយ។ នៅសល់ពលរដ្ឋចំនួន ៤៥,៥៥៩នាក់ (ស្ត្រី ២៣,៨៨១នាក់ និងកុមារ ១៥,០៨៣នាក់) នៅពុំទាន់អាចវិលទៅផ្ទះបាន។

២. សេវាសាធារណៈផ្អាកសកម្ម៖ សាលារៀន និងមន្ទីរពេទ្យនៅតំបន់ព្រំដែននៅតែផ្អាកសកម្ម។ ខេត្តឧត្តរមានជ័យមានសាលារៀន៨ និងមន្ទីរពេទ្យ៥ ខេត្តបន្ទាយមានជ័យមានសាលារៀន៥ និងមន្ទីរពេទ្យ១ ខេត្តព្រះវិហារមានសាលារៀន២៩ និងមន្ទីរពេទ្យ១៤ នៅផ្អាក។

៣. ការខូចខាតទ្រព្យសម្បត្តិ៖ គ្មានរបាយការណ៍ថ្មីអំពីការខូចខាតទ្រព្យសម្បត្តិសាធារណៈ និងឯកជនបន្ថែមទេ ចាប់តាំងពីថ្ងៃទី៧ ខែធ្នូ ឆ្នាំ២០២៥។

ក្រសួងមហាផ្ទៃបានអំពាវនាវឱ្យសហគមន៍អន្តរជាតិចូលរួមគាំទ្រការដោះស្រាយជម្លោះព្រំដែនតាមរយៈវិធីសន្តិវិធី ដោយអនុលោមតាមច្បាប់អន្តរជាតិ និងសន្ធិសញ្ញាដែលមានស្រាប់។

សម្តេចហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា សន្តិភាពនៅតែជាគុណតម្លៃស្នូលរបស់កម្ពុជា ហើយប្រទេសកម្ពុជាតម្រូវឱ្យមានការអនុវត្តពេញលេញ និងស្មោះត្រង់នូវកិច្ចព្រមព្រៀងដែលមានស្រាប់រវាងកម្ពុជា-ថៃ។

ដោយ៖ តារា