By ភ្នំពេញ៖ លោក ថេង សុថុល អភិបាលខណ្ឌ៧មករា បានដឹកនាំកិច្ចប្រជុំដើម្បីពង្រឹងការងារបង្ក្រាបបទល្មើសអនឡាញ (Online Scam) ចាប់ពីថ្នាក់មូលដ្ឋានភូមិ-សង្កាត់ រហូតដល់ថ្នាក់ខណ្ឌ។
កិច្ចប្រជុំនេះធ្វើឡើងកាលពីថ្ងៃទី០៩ ខែមីនា ឆ្នាំ២០២៦ ដោយមានការចូលរួមពីលោកអភិបាលរងខណ្ឌ អធិការនគរបាល មេបញ្ជាការកងរាជអាវុធហត្ថ និងចៅសង្កាត់ទាំង៨ក្នុងខណ្ឌ។
លោកអភិបាលបានលើកឡើងថា ការសហការរវាងអាជ្ញាធរមូលដ្ឋាន កម្លាំងសន្តិសុខ និងមន្រ្តីពាក់ព័ន្ធមានសារៈសំខាន់ក្នុងការតាមដានសកម្មភាពគួរសង្ស័យ។ លោកបានណែនាំឱ្យបន្តពង្រឹងការត្រួតពិនិត្យទីតាំងស្នាក់នៅប្រមូលផ្តុំ និងកន្លែងដែលមានជនបរទេសស្នាក់នៅច្រើន។
លោកបានបញ្ជាក់ថា ក្នុងខណ្ឌ៧មករា មានទីតាំងអាគារ ខុនដូរ អាផានមិន និងសណ្ឋាគារចំនួន៨៧ទីតាំង ដែលកម្លាំងគណៈបញ្ជាការឯកភាពបានចុះត្រួតពិនិត្យរួចរាល់ ហើយមិនមានបទល្មើសឆបោកតាមប្រព័ន្ធអនឡាញទេ។
ទោះជាយ៉ាងណា កម្លាំងគណៈបញ្ជាខណ្ឌនឹងបន្តចុះត្រួតពិនិត្យឡើងវិញ ដើម្បីធានាថាមិនអនុញ្ញាតឱ្យមានបទល្មើសកើតឡើង និងរក្សាមូលដ្ឋានខណ្ឌ៧មករាជាតំបន់សុវត្ថិភាពដាច់ខាត។
កិច្ចប្រជុំនេះមានគោលបំណងធានាប្រសិទ្ធភាពខ្ពស់ក្នុងការអនុវត្តគោលនយោបាយរបស់រាជរដ្ឋាភិបាល ក្នុងការគ្រប់គ្រងសន្តិសុខ និងសុវត្ថិភាពសង្គម។
ដោយ៖ តារា
