ចិនស្នើឱ្យឈប់បាញ់ប្រហារ នៅមជ្ឈិមបូព៌ា ក្នុងជំនួបជាន់ខ្ពស់ជាមួយអារ៉ាប៊ីសាអូឌីត

បេសកជនពិសេសរបស់ប្រទេសចិន លោក Zhai Jun បានជួបជាមួយរដ្ឋមន្ត្រីការបរទេសអារ៉ាប៊ីសាអូឌីត លោក Faisal bin Farhan Al Saud នៅទីក្រុងរីយ៉ាដ កាលពីថ្ងៃអាទិត្យ ដោយជំរុញឱ្យគ្រប់ភាគីបញ្ឈប់ប្រតិបត្តិការយោធាជាបន្ទាន់។

ក្នុងជំនួបដ៏សំខាន់នេះ លោក Zhai Jun បានអះអាងថា ប្រទេសចិនជំរុញឱ្យគ្រប់ភាគីទាំងអស់បញ្ឈប់ការបាញ់ប្រហារជាបន្ទាន់ ដើម្បីទប់ស្កាត់ការកើនឡើងនៃភាពតានតឹង និងជៀសវាងការបង្កគ្រោះថ្នាក់ធ្ងន់ធ្ងរដល់ប្រជាជនក្នុងតំបន់។

យោងតាម Global Times ផ្សាយថ្ងៃទី៩ ខែមីនា ឆ្នាំ២០២៦ លោក Zhai ក៏បានជួបជាមួយលោក Jassim Mohammed Al-Budaiwi អគ្គលេខាធិការនៃក្រុមប្រឹក្សាសហប្រតិបត្តិការសម្រាប់រដ្ឋអារ៉ាប់នៃឈូងសមុទ្រ (GCC) នៅថ្ងៃដដែលនោះផងដែរ។

លោក Faisal បានពន្យល់ថា ស្ថានភាពនៅមជ្ឈិមបូព៌ាកំពុងប្រទះវិបត្តិដែលមិនធ្លាប់មានពីមុនមក ដោយអណ្តាតភ្លើងនៃសង្គ្រាមបានរីករាលដាលដល់ប្រទេសឈូងសមុទ្រ។

ភាគីអារ៉ាប៊ីសាអូឌីតនិង GCC បានកោតសរសើរចំពោះការប្តេជ្ញាចិត្តរបស់ប្រទេសចិន និងសង្ឃឹមថាប្រទេសចិននឹងបន្តដើរតួនាទីសកម្មក្នុងការលើកកម្ពស់បទឈប់បាញ់ និងបញ្ចប់អរិភាព។

លោក Zhai បានថ្លែងថា៖ «ស្ថានភាពក្នុងតំបន់បច្ចុប្បន្នមានភាពស្មុគស្មាញ និងរសើបខ្លាំង ប្រទេសចិនជំរុញឱ្យគ្រប់ភាគីទាំងអស់បញ្ឈប់ការបាញ់ប្រហារជាបន្ទាន់ ទប់ស្កាត់ការកើនឡើងនៃភាពតានតឹងបន្ថែមទៀត និងវិលត្រឡប់ទៅរកផ្លូវនៃការចរចា»។

លោក Al-Budaiwi បានព្រមានថា ការកើនឡើងនៃភាពតានតឹងនៅក្នុងតំបន់ឈូងសមុទ្រគំរាមកំហែងយ៉ាងធ្ងន់ធ្ងរដល់សន្តិសុខ និងស្ថិរភាពពិភពលោក។