By ភ្នំពេញ៖ កូរ៉េខាងជើងបានចេញសេចក្តីព្រមានដ៏ធ្ងន់ធ្ងរបំផុតទៅកាន់សហរដ្ឋអាមេរិក និងកូរ៉េខាងត្បូង ដោយសង្កត់ធ្ងន់ពី«ផលវិបាកដ៏គួរឲ្យភ័យខ្លាចដែលមិនអាចនឹកស្មានដល់» ក្រោយពីសមយុទ្ធយោធារួមគ្នារវាងប្រទេសទាំងពីរបានចាប់ផ្តើមដំណើរការ។
លោកស្រី Kim Yo Jong ប្អូនស្រីរបស់មេដឹកនាំកូរ៉េខាងជើង លោក គីម ជុងអ៊ុន បានចេញសេចក្តីថ្លែងការណ៍មួយតាមរយៈប្រព័ន្ធផ្សព្វផ្សាយរដ្ឋ KCNA នាថ្ងៃអង្គារទី១០មីនា ដោយព្រមានថា សមយុទ្ធយោធាប្រចាំឆ្នាំឈ្មោះ «Freedom Shield» បានបង្ហាញនូវគោលនយោបាយអរិភាពជាទម្លាប់របស់ក្រុមប្រទេសសម្ព័ន្ធមិត្តរបស់កូរ៉េខាងត្បូង។
«ការបង្ហាញកម្លាំងយោធាបែបនេះ គឺជាការហាត់សមញុះញង់សម្រាប់សង្គ្រាម និងឈ្លានពាន» លោកស្រីបានអះអាង។
សមយុទ្ធនេះពាក់ព័ន្ធនឹងកងកម្លាំងកូរ៉េខាងត្បូង និងអាមេរិកជាង ១៨,០០០ នាក់ ដែលកំពុងរៀបចំទាំងយប់ទាំងថ្ងៃ និងបានឆ្លងកាត់ទឹកដី សមុទ្រ អាកាស លំហអាកាស និងលំហអ៊ីនធឺណិតរបស់កូរ៉េខាងជើង។
ទោះជាយ៉ាងណា ទីក្រុងសេអ៊ូល និងទីក្រុងវ៉ាស៊ីនតោនបានបញ្ជាក់ថា សមយុទ្ធដែលដំណើរការចាប់ពីថ្ងៃទី៩ ដល់ថ្ងៃទី១៩ខែមីនា គឺមាន«លក្ខណៈការពារ» និងនឹងរួមបញ្ចូលសេណារីយ៉ូទប់ស្កាត់ដែលទាក់ទងនឹងអាវុធនុយក្លេអ៊ែររបស់កូរ៉េខាងជើង។
មន្ត្រីមកពីប្រទេសទាំងពីរបានលើកឡើងថា សមយុទ្ធនេះក៏នឹងបម្រើជាឱកាសមួយដើម្បីគាំទ្រដល់ការរៀបចំសម្រាប់ការផ្ទេរការគ្រប់គ្រងប្រតិបត្តិការសម័យសង្គ្រាមរបស់សហរដ្ឋអាមេរិកទៅឲ្យកូរ៉េខាងត្បូងផងដែរ។
