By ភ្នំពេញ៖ កម្ពុជា និងចក្រភពអង់គ្លេស បានប្រកាសដាក់ឱ្យអនុវត្តជាផ្លូវការនូវកិច្ចព្រមព្រៀងយោគយល់គ្នា (MoU) ស្តីពីការអភិវឌ្ឍធនធានមនុស្សតាមរយៈកម្មវិធីបណ្តុះបណ្តាលបច្ចេកទេស និងវិជ្ជាជីវៈ (TVET) លំដាប់ពិភពលោក។
កិច្ចសហការនេះត្រូវបានដាក់ឱ្យអនុវត្តជាផ្លូវការក្នុងពិធីដ៏ខ្ពង់ខ្ពស់ ដែលធ្វើឡើងនៅសណ្ឋាគារ ហៃយ៉ាត់ រីជិនស៊ី ភ្នំពេញ នាថ្ងៃទី១០ ខែមីនា ឆ្នាំ២០២៦ ដោយមានការអញ្ជើញចូលរួមពីលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងលោក ដូមីនិក វីល្លៀម ឯកអគ្គរាជទូតចក្រភពអង់គ្លេសប្រចាំកម្ពុជា។
លោករដ្ឋមន្ត្រី ហេង សួរ បានចាត់ទុកកិច្ចសហការនេះថា ជាជំហានដ៏សំខាន់មួយក្នុងការពង្រឹងកិច្ចសហប្រតិបត្តិការ ការចែករំលែកចំណេះដឹង និងការភ្ជាប់ស្ថាប័ន ដើម្បីធានាថា កម្លាំងពលកម្មកម្ពុជាមានជំនាញគ្រប់គ្រាន់សម្រាប់អនាគត។ ពិធីប្រកាសនេះធ្វើឡើងក្នុងវេទិកាជំនាញ និង TVET កម្ពុជា-អង់គ្លេស ឆ្នាំ២០២៦ ក្រោមប្រធានបទ “ការកសាងកម្លាំងពលកម្មត្រៀមខ្លួនសម្រាប់អនាគត តាមរយៈភាពជាដៃគូ”។
លោករដ្ឋមន្ត្រីបានលើកឡើងថា ក្នុងពេលកម្ពុជាកំពុងធ្វើទំនើបកម្មប្រព័ន្ធ TVET ជាតិ កិច្ចព្រមព្រៀងនេះពិតជាមានសារៈសំខាន់ជាយុទ្ធសាស្ត្រ និងទាន់ពេលវេលាបំផុតសម្រាប់កម្ពុជា។ ជាពិសេសសម្រាប់យុវជនដែលជាកម្លាំងពលកម្មដ៏សកម្ម និងជាមូលដ្ឋានសំខាន់សម្រាប់ការរីកចម្រើននៃសេដ្ឋកិច្ចជាតិ។
កិច្ចសហការនេះនឹងផ្តោតលើការអភិវឌ្ឍជំនាញបៃតង និងការបញ្ចូលនវានុវត្តន៍ឌីជីថលទៅក្នុងប្រព័ន្ធ TVET របស់កម្ពុជា។ លោក ហេង សួរ បានបង្ហាញការជឿជាក់ថា MoU នេះនឹងជួយកម្ពុជាបញ្ចូលវិធីសាស្ត្របណ្តុះបណ្តាលទំនើបៗលំដាប់ពិភពលោក និងបង្កើតភាពជាដៃគូរវាងស្ថាប័នកម្ពុជា-អង់គ្លេសក្នុងការស្រាវជ្រាវលើវិស័យកំពុងលេចធ្លោ។
ទន្ទឹមនេះ លោក វីល្លៀម បានបង្ហាញមោទនភាពចំពោះ “ភាពជាដៃគូ” នេះ ដែលចាត់ទុកថាជា “ជំពូកថ្មីដ៏រំភើប” នៃប្រទេសទាំងពីរ។ លោកសង្ឃឹមថា កិច្ចសហការនេះនឹងនាំមកនូវជំនាញបច្ចេកទេស និងវិជ្ជាជីវៈរបស់ចក្រភពអង់គ្លេស មកបញ្ចូលក្នុងចក្ខុវិស័យអភិវឌ្ឍន៍របស់កម្ពុជា។
កិច្ចសហការនេះមានគោលដៅសំខាន់ក្នុងការបង្កើតកម្លាំងពលកម្មត្រៀមខ្លួនសម្រាប់អនាគត ឆ្លើយតបទៅនឹងតម្រូវការឧស្សាហកម្ម និងគាំទ្រការសម្រេចចក្ខុវិស័យកម្ពុជាជាប្រទេសមានចំណូលខ្ពស់នាឆ្នាំ២០៥០។
ភាគីទាំងពីរបានប្តេជ្ញាចិត្តថានឹងប្រើប្រាស់ធនធានចាំបាច់នានា ដើម្បីអនុវត្តឱ្យសម្រេចបាននូវលទ្ធផលជាយុទ្ធសាស្ត្រនេះ និងពង្រីកកិច្ចសហប្រតិបត្តិការទ្វេភាគីឱ្យកាន់តែទូលំទូលាយនាពេលអនាគត។
