By រាជធានីភ្នំពេញ៖ ស្ថានភាពជំងឺរបស់តារាកំប្លែងល្បីនាយក្រិន កំពុងធ្ងន់ធ្ងរបំផុត បន្ទាប់ពីមេរោគបានរាលដាលពេញឈាមនិងដល់ខួរក្បាល។
យោងតាមព័ត៌មានពីលោក សា វិន ហ្វីលីព (Savin Phillip) ដែលបានចុះផ្សាយនៅលើហ្វេសបុក បានបញ្ជាក់ថា៖ «វេជ្ជបណ្ឌិតបានអះអាងនៅព្រឹកថ្ងៃទី១១ មីនា ថា នាយក្រិន មានជំងឺរលាកប្រអប់ត្រចៀកខាងឆ្វេងធ្ងន់ធ្ងរ ហើយបានបង្កជាមេរោគយ៉ាងច្រើន។ មេរោគទាំងនោះបានរាលដាលចូលពេញឈាមនិងដល់ខួរក្បាល ដោយមានចំនួនរហូតដល់២៤ពាន់មេរោគ។»
លោកបន្តថា៖ «ពេលនេះ នាយក្រិនគាត់វង្វេងវង្វាន់មិនស្គាល់ខ្ញុំទេ។ ខ្ញុំគិតថា នេះអាចជារឿងគ្រោះថ្នាក់ដល់ជីវិតរបស់គាត់ បើយើងបណ្ដែតបណ្ដោយទុកគាត់នៅគ្លីនីកខេត្តយូរតទៅទៀត។ ដូច្នេះខ្ញុំបានស្នើសុំដល់វេជ្ជបណ្ឌិតនៅគ្លីនីកសុវណ្ណ ក្រុងបាត់ដំបង ដើម្បីបញ្ជូននាយក្រិនមកសង្គ្រោះបន្ទាន់នៅភ្នំពេញ។»
លោកបានបន្ថែមថា នៅពេលទៅដល់ភ្នំពេញ នឹងមានតារាកំប្លែងប្រឹមប្រិយ ចាំទទួលជួយគាត់។ នាយក្រិន មើលទៅកំសត់ណាស់ គ្មានអ្នកមើលថែគាត់ទេក្នុងមន្ទីរពេទ្យ ក្រៅពីកូនតូចៗទាំងបី។ ចំណែកឳពុកកំពុងដេកឈឺសួតធ្ងន់ធ្ងរ ដាក់អុកស៊ីហ្សែនជាប់រហូតរាប់ឆ្នាំហើយ។
សូមរំលឹកថា នាយក្រិន ធ្លាក់ខ្លួនឈឺប៉ះពាល់ប្រព័ន្ធប្រសាទរហូតវង្វេងលែងដឹងខ្លួនមករយៈពេលយូរហើយ។
អត្ថបទសរសេរដោយ សហការី
កែសម្រួលដោយ ស្រីណា
