By ទីក្រុងបាងកក – រដ្ឋាភិបាលថៃបានចាប់ផ្ដើមអនុវត្តវិធានការសន្សំថាមពលយ៉ាងតឹងរ៉ឹង ដោយបញ្ជាឱ្យមន្ត្រីរាជការប្រើប្រាស់ជណ្ដើរជើងជំនួសជណ្ដើរយន្ត និងធ្វើការពីផ្ទះ ដើម្បីទប់ទល់នឹងសម្ពាធលើការផ្គត់ផ្គង់ថាមពលដែលកើតឡើងដោយជម្លោះនៅមជ្ឈិមបូព៌ា។
អ្នកនាំពាក្យរដ្ឋាភិបាល លោកស្រី Lalida Periswiwatana បានប្រាប់អ្នកយកព័ត៌មានថា នាយករដ្ឋមន្ត្រីអានុទីន ឆាន់វីរៈគុល បានបញ្ជាឱ្យចាប់ពីថ្ងៃទី១០ មីនា ២០២៦ តទៅ មន្ត្រីរាជការនឹងធ្វើការពីផ្ទះ លើកលែងតែមន្ត្រីចាំបាច់ត្រូវបម្រើសាធារណ។
រដ្ឋមន្ត្រីក្រសួងថាមពល លោក Auttapol Rerkpiboon បានឱ្យដឹងថា ប្រទេសថៃអាចទប់ទល់ការខ្វះខាតថាមពលប្រហែល ៩៥ ថ្ងៃដែលនៅសល់ ហើយកំពុងស្វែងរកប្រភពឧស្ម័នធម្មជាតិរាវ (LNG) បន្ថែមពីសហរដ្ឋអាមេរិក អូស្ត្រាលី និងអាហ្វ្រិកខាងត្បូង។
វិធានការផ្សេងទៀតរួមមានការកំណត់សីតុណ្ហភាពម៉ាស៊ីនត្រជាក់នៅ ២៦-២៧ អង្សាសេ ពាក់អាវដៃខ្លីជំនួសសម្លៀកបំពាក់ផ្លូវការ និងកាត់បន្ថយការប្រើអគ្គិសនីនៅអគារការិយាល័យ។ រដ្ឋាភិបាលក៏នឹងស្នើសុំឱ្យសាធារណជនចូលរួមសហការក្នុងការសន្សំថាមពល។
ប្រសិនបើស្ថានភាពកាន់តែធ្ងន់ធ្ងរឡើង រដ្ឋាភិបាលអាចពិចារណាលើវិធានការចាំបាច់ផ្សេងទៀត រួមទាំងការបន្ថយភ្លើងផ្លាកសញ្ញាផ្សាយពាណិជ្ជកម្ម និងបិទស្ថានីយប្រេងឥន្ធនៈនៅម៉ោង ១០ យប់។
យោងតាមគណៈកម្មការបទប្បញ្ញត្តិថាមពលថៃ ជិត ៦៨% នៃតម្រូវការថាមពលរបស់ប្រទេសថៃត្រូវបានបំពេញពីឧស្ម័នធម្មជាតិ។ កាលពីដើមខែនេះ ប្រទេសថៃក៏បានផ្អាក់ការនាំចេញថាមពលទៅកាន់ប្រទេសទាំងអស់លើកលែងឡាវ និងមីយ៉ាន់ម៉ា៕
