រត់មិនរួចទេ! ជនលួចក្នុងហាងកាហ្វេត្រូវចាប់ក្រោយ៦ម៉ោង

រាជធានីភ្នំពេញ៖ ជនសង្ស័យម្នាក់ដែលធ្វើសកម្មភាពលួចទ្រព្យសម្បត្តិក្នុងហាងកាហ្វេមួយ ត្រូវបានកម្លាំងនគរបាលចាប់ខ្លួនបានក្រោយពីគេចខ្លួនបានត្រឹមតែ៦ម៉ោងប៉ុណ្ណោះ។

ជនសង្ស័យឈ្មោះ ជា សុភ័ក្រ អាយុ៤១ឆ្នាំ ត្រូវបានកម្លាំងព្រហ្មទណ្ឌនគរបាលខណ្ឌទួលគោកចាប់ខ្លួននៅថ្ងៃទី១១ ខែមីនា ឆ្នាំ២០២៦ វេលាម៉ោង០៨:៣០នាទីព្រឹក។ គាត់ត្រូវបានចោទប្រកាន់ពីបទលួចទ្រព្យសម្បត្តិក្នុងហាងកាហ្វេ THE PEACE ដែលមានតម្លៃសរុប១,៧៥០ដុល្លារ។

ហេតុការណ៍នេះបានកើតឡើងនៅយប់រំលងអធ្រាត្រថ្ងៃទី១០ ខែមីនា នៅពេលដែលជនរងគ្រោះ ឈ្មោះ ចាន់ ស៊ីណា អាយុ២៥ឆ្នាំ កំពុងដេកលក់។ ជនសង្ស័យបានចូលលួចយកទ្រព្យសម្បត្តិជាច្រើនរួមមាន៖ ទូកាសៀ០១គ្រឿង, Laptop ពណ៌ខ្មៅ០១គ្រឿង, ហ្គីតា០១គ្រឿង, តុនិងកៅអី០២ឈុត, លុយ៥០០ដុល្លារ និងភេសជ្ជៈមួយចំនួន។

ក្រោយពីទទួលបានព័ត៌មាន កម្លាំងនគរបាលខណ្ឌទួលគោកបានសហការជាមួយនគរបាលប៉ុស្តិ៍ ធ្វើការស្រាវជ្រាវយ៉ាងរហ័ស ហើយអាចចាប់ខ្លួនជនសង្ស័យបានក្នុងរយៈពេលត្រឹម៦ម៉ោងប៉ុណ្ណោះ។

បច្ចុប្បន្ន ជនសង្ស័យត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការតាមនីតិវិធី។ ការចាប់ខ្លួនរហ័សនេះបង្ហាញពីប្រសិទ្ធភាពក្នុងការប្រយុទ្ធបទល្មើសរបស់កម្លាំងសមត្ថកិច្ច។

សរសេរដោយ៖ ម៉េង ធា
កែសម្រួលដោយ៖ កៀន សុឃាក់