ចិនបញ្ជូនពលរដ្ឋជាង១ម៉ឺននាក់ពីមជ្ឈិមបូព៌ាត្រឡប់មកស្រុកវិញ បន្ទាប់ពីសង្គ្រាមផ្ទុះ

ភ្នំពេញ – ក្រសួងការបរទេសចិនបានប្រកាសកាលពីថ្ងៃទី១០មីនាថា ប្រជាជនចិនជាង១ម៉ឺននាក់ត្រូវបានជួយឱ្យវិលត្រឡប់មកប្រទេសវិញដោយសុវត្ថិភាព បន្ទាប់ពីសង្គ្រាមនៅមជ្ឈិមបូព៌ាបានបង្ខំឱ្យបិទដែនអាកាសនៅក្នុងតំបន់។

លោក Guo Jiakun អ្នកនាំពាក្យក្រសួងការបរទេសចិនបានបញ្ជាក់នៅក្នុងសន្និសីទសារព័ត៌មានថា ពលរដ្ឋចិនទាំងនេះបានចាកចេញពីប្រទេសអ៊ីរ៉ង់ អារ៉ាប់រួម អូម៉ង់ និងអារ៉ាប៊ីសាអូឌីត។ ក្នុងចំណោមពលរដ្ឋទាំងនេះ មានជាង៣០០០នាក់ដែលជម្លៀសចេញពីអ៊ីរ៉ង់។

លោក Guo បានពន្យល់បន្ថែមថា ក្រសួងការបរទេស និងរដ្ឋបាលអាកាសចរណ៍ស៊ីវិលបានណែនាំក្រុមហ៊ុនអាកាសចរណ៍ក្នុងស្រុកឱ្យបង្កើនសមត្ថភាព ដើម្បីជួយពលរដ្ឋចិនដែលជាប់គាំងនៅមជ្ឈិមបូព៌ាឱ្យត្រឡប់មកផ្ទះវិញ។

សង្គ្រាមនៅមជ្ឈិមបូព៌ាបានផ្ទុះឡើងកាលពីថ្ងៃទី២៨កុម្ភៈ បន្ទាប់ពីសហរដ្ឋអាមេរិក និងអ៊ីស្រាអែលបានវាយប្រហារលើអ៊ីរ៉ង់។ ការវិវត្តនេះបណ្តាលឱ្យដែនអាកាសជាច្រើនត្រូវបិទ ដែលរំខានដល់ជើងហោះហើរពាណិជ្ជកម្ម។

ទោះជាយ៉ាងណា ក្រុមហ៊ុនអាកាសចរណ៍ចិនធំៗដូចជា Air China និង China Southern Airlines បានបន្តជើងហោះហើរឡើងវិញនៅដើមខែនេះ រវាងទីក្រុងចិន និងមជ្ឈមណ្ឌលអាកាសចរណ៍នៅតំបន់ឈូងសមុទ្រដូចជាទីក្រុងរីយ៉ាដ និងឌូបៃ។