By រាជធានីភ្នំពេញ៖ ឯកឧត្តម ហេង សួរ រដ្ឋមន្ត្រី បានទទួលអំណោយខោអាវចំនួន ១០,០០០ ពីក្រុមហ៊ុនហ្គេមពីររួមមាន ក្រុមហ៊ុន ម៉ាកាឡូត ហ្គាមិន (កម្ពុជា) ខូអិលធីឌី និងក្រុមហ៊ុន មហា ហ្គាមិន ខូអិលធីឌី ក្នុងស្មារតី «ខ្មែរស្រឡាញ់ខ្មែរ ខ្មែរជួយខ្មែរ ខ្មែរតែមួយ»។
ឯកឧត្តមរដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះទឹកចិត្តរបស់ក្រុមហ៊ុនទាំងពីរ ដែលបានផ្តល់អំណោយមកក្រសួង ដើម្បីយកទៅផ្តល់ជូនវីរកងទ័ពជួរមុខ និងជនភៀសសឹកដែលកំពុងជួបការលំបាកក្នុងការរស់នៅ។
អំណោយរបស់ក្រុមហ៊ុន ម៉ាកាឡូត ហ្គាមិន (កម្ពុជា) ខូអិលធីឌី មានខោអាវចំនួន ៥,០០០ ខោអាវ ខណៈដែលក្រុមហ៊ុន មហា ហ្គាមិន ខូអិលធីឌី ក៏បានផ្តល់ខោអាវចំនួន ៥,០០០ ខោអាវដែរ ធ្វើឱ្យចំនួនសរុបមានរហូតដល់ ១០,០០០ ខោអាវ។
ការផ្តល់អំណោយនេះបង្ហាញពីស្មារតីសាមគ្គីភាពជាតិ និងការចូលរួមរបស់វិស័យឯកជនក្នុងការជួយសង្គ្រោះសង្គម ជាពិសេសក្រុមដែលត្រូវការជំនួយបំផុតនៅក្នុងប្រទេស។ អំណោយទាំងនេះនឹងត្រូវបានចែកចាយទៅកាន់កងទ័ពជួរមុខ និងជនភៀសសឹកតាមតំបន់ផ្សេងៗដើម្បីជួយបំបាត់ការខ្វះខាតសំលៀកបំពាក់។
