By ខេត្តស្វាយរៀង៖ ក្រុមការងារអន្តរមន្ទីរបានចុះត្រួតពិនិត្យស្ថានីយ៍លក់ប្រេងឥន្ធនៈទូទាំងខេត្ត ក្រោមការណែនាំពីលោកប៉េង ពោធិ៍សា អភិបាលខេត្តស្វាយរៀង។
ការត្រួតពិនិត្យរយៈពេល៤ថ្ងៃបានបង្ហាញថា ក្នុងចំណោមស្ថានីយ៍ប្រេងឥន្ធនៈ២៥៦ទីតាំងទូទាំងខេត្ត មានស្ថានីយ៍និងដេប៉ូចំនួន៦៩កន្លែងបានបិទបណ្តោះអាសន្ន ដោយសារអស់ប្រេងក្នុងស្តុក។
លោក ប៉ាត់ សាក់ ប្រធានស្ដីទីមន្ទីររ៉ែនិងថាមពលខេត្តស្វាយរៀងបានបញ្ជាក់ថា គិតត្រឹមថ្ងៃទី១១ ខែមីនា ឆ្នាំ២០២៦ ខេត្តស្វាយរៀងមានស្ថានីយ៍ប្រេងឥន្ធនៈសរុប២៥៦កន្លែង រួមមាន៖
• ស្ថានីយ៍ប្រេងឥន្ធនៈ២០២កន្លែង
• ស្ថានីយ៍ឧស្ម័នឥន្ធនៈ៩កន្លែង
• ស្ថានីយ៍រួមប្រេងនិងឧស្ម័ន៤៥កន្លែង
ស្ថានភាពបច្ចុប្បន្នបង្ហាញថា៖
• ស្ថានីយ៍កំពុងដំណើរការ១៨៧កន្លែង
• ស្ថានីយ៍អស់ស្តុកផ្អាកដំណើរការ៣៨កន្លែង
• ស្ថានីយ៍ផ្អាកបណ្តោះអាសន្នដោយខ្លួនឯង២១កន្លែង
• ស្ថានីយ៍ប្រេងឥន្ធនៈបានបិទ១០កន្លែង
លោកប្រធានមន្ទីរបានបន្ថែមថា ស្ថានីយ៍ប្រេងឥន្ធនៈនិងឧស្ម័នឥន្ធនៈចំនួន១៩៨កន្លែងបានដាក់ពាក្យស្នើសុំវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួង។
ក្រុមការងារអន្តរមន្ទីរមានសមាសភាពពីមន្ទីរពាណិជ្ជកម្មខេត្តស្វាយរៀង មន្ទីររ៉ែនិងថាមពលខេត្ត សាខាក.ប.ប.ខេត្ត និងមន្ត្រីសាលាខេត្ត ដែលបានចុះត្រួតពិនិត្យស្ថានភាពស្តុក និងតម្លៃប្រេងឥន្ធនៈតាមបណ្តាស្ថានីយ៍និងដេប៉ូលក់ប្រេង។
ការត្រួតពិនិត្យនេះធ្វើឡើងដើម្បីធានាការផ្គត់ផ្គង់ប្រេងឥន្ធនៈគ្រប់គ្រាន់ និងការគ្រប់គ្រងតម្លៃប្រេងឱ្យសមស្របតាមការកំណត់របស់រដ្ឋាភិបាល។
ដោយ៖ សុថាន
