By ភ្នំពេញ៖ អាជ្ញាធរសង្កាត់ជ្រោយចង្វារ និងប៉ុស្តិ៍នគរបាលសង្កាត់បានចុះអន្តរាគមន៍ហាមឃាត់ការចាក់ធុងបាស់សំលេងខ្លាំងៗដែលបង្កការរំខានដល់អ្នកជិតខាងនៅក្នុងតំបន់។
ហេតុការណ៍នេះបានកើតឡើងនាយប់ថ្ងៃទី១១ ខែមីនា ឆ្នាំ២០២៦ នៅផ្លូវបេតុងមុខបុរីរីវែថោន ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
យោងតាមអាជ្ញាធរសង្កាត់ជ្រោយចង្វារ ការចាក់ធុងបាស់សំលេងខ្លាំងៗនេះធ្វើឡើងដោយប្រជាពលរដ្ឋមួយគ្រួសារដែលកំពុងជួបជុំគ្នាពិសារអាហារពេលល្ងាច។ សំលេងខ្លាំងៗពីធុងបាស់បានបង្កការរំខានយ៉ាងខ្លាំងដល់អ្នកជិតខាង ធ្វើឲ្យអាជ្ញាធរត្រូវចុះអន្តរាគមន៍។
“យើងទទួលបានការចង្អុលបង្ហាញពីរដ្ឋបាលខណ្ឌ ហើយបានសហការជាមួយប៉ុស្តិ៍នគរបាលសង្កាត់ចុះណែនាំប្រជាពលរដ្ឋឲ្យឈប់ចាក់ធុងបាស់” នេះបើតាមប្រភពពីអាជ្ញាធរសង្កាត់។
អាជ្ញាធរបានពន្យល់ថា ការចាក់ធុងបាស់ដែលឮសំលេងខ្លាំងពេកនេះប៉ះពាល់ដល់សិទ្ធិអ្នកជិតខាង និងបង្កឱ្យមានការរំខានដល់ការសម្រាកពីការងាររបស់ប្រជាពលរដ្ឋក្នុងតំបន់។
បន្ទាប់ពីទទួលបានការណែនាំពីអាជ្ញាធរ ម្ចាស់ទីតាំងបានយល់ព្រមឈប់ចាក់ធុងបាស់ និងសន្យាថានឹងមិនបង្កសំលេងរំខានទៀតទេ។
ករណីនេះបង្ហាញពីការយកចិត្តទុកដាក់របស់អាជ្ញាធរក្នុងការថែរក្សាសុខសន្តិភាពសាធារណៈ និងការពារសិទ្ធិរបស់ប្រជាពលរដ្ឋក្នុងការរស់នៅក្នុងបរិស្ថានស្ងប់ស្ងាត់។
ដោយ៖ ចន្ទ លីហ្សា
