By ខេត្តកណ្តាល៖ អគ្គីភ័យឆាបឆេះយ៉ាងខ្លាំងក្លាបានបំផ្លាញផ្ទះប្រជាពលរដ្ឋចំនួន៣ខ្នងនៅក្រុងអរិយក្សត្រ កាលពីយប់ថ្ងៃទី១១ មីនា ២០២៦ នៅភូមិស្វាយជ្រំ។
ក្រុមពន្លត់អគ្គីភ័យពីអធិការដ្ឋាននគរបាលក្រុង រួមជាមួយអាជ្ញាធរពាក់ព័ន្ធបានចុះជួយពន្លត់អគ្គីភ័យយ៉ាងឆាប់រហ័ស។ លោកអភិបាលក្រុងអរិយក្សត្របានដឹកនាំការអន្តរាគមន៍ដោយផ្ទាល់។
ប្រភពពីរដ្ឋបាលក្រុងបានឲ្យដឹងថា ក្រុមការងារបានប្រើឡានទឹកចំនួន៧គ្រឿង សរុបទឹក៥៦គីប ដើម្បីគ្រប់គ្រងស្ថានការណ៍បានទាំងស្រុង។ ទោះជាយ៉ាងណា ការខូចខាតទ្រព្យសម្បត្តិពិតប្រាកដនៅមិនទាន់អាចកំណត់បាននៅឡើយទេ។
លោកអភិបាលក្រុងបានថ្លែងអំណរគុណដល់ក្រុមពន្លត់អគ្គីភ័យទាំងអស់ រួមមានពីបុរីវីឡាទួលសង្កែអរិយក្សត្រ និងរដ្ឋបាលស្រុកល្វាឯម ដែលបានជួយពន្លត់អគ្គីភ័យបានទាន់ពេលវេលា។
សមត្ថកិច្ចកំពុងស្រាវជ្រាវហេតុផលនៃការកើតអគ្គីភ័យ និងធ្វើកំណត់ហេតុសួនាំម្ចាស់ផ្ទះដើម្បីវាយតម្លៃការខូចខាតទ្រព្យសម្បត្តិ។
ដោយ៖ ចន្ទ លីហ្សា
