សង្គ្រាមមជ្ឈិមបូព៌ាបន្តអូសបន្លាយ តម្លៃប្រេងឥន្ទនៈនឹងកើនឡើងខ្លាំង ប៉ះពាល់គ្រប់វិស័យនៅកម្ពុជា

ភ្នំពេញ៖ អ្នកនាំពាក្យអាកាសចរណ៍ស៊ីវិលកម្ពុជា លោក ស៊ីន ចាន់សិរីវុត្ថា បានដាស់តឿនព្រមានថា ប្រសិនបើសង្គ្រាមនៅតំបន់មជ្ឈិមបូព៌ាបន្តអូសបន្លាយ នឹងបង្កផលប៉ះពាល់យ៉ាងធ្ងន់ធ្ងរទៅលើសេដ្ឋកិច្ចកម្ពុជា ជាពិសេសតម្លៃប្រេងឥន្ទនៈដែលនឹងកើនឡើងខ្លាំង។

លោកអ្នកនាំពាក្យបានពន្យល់ថា ផលប៉ះពាល់មិនមែនត្រឹមតែវិស័យអាកាសចរណ៍ប៉ុណ្ណោះទេ ប៉ុន្តែនឹងរាលដាលទៅគ្រប់វិស័យនៃសេដ្ឋកិច្ច។ ការកើនឡើងនៃតម្លៃប្រេងនឹងបង្កឱ្យការចំណាយផលិតកម្មកើនឡើង ដែលនឹងប៉ះពាល់ដល់តម្លៃទំនិញ និងសេវាកម្មទាំងអស់។

លោក ស៊ីន ចាន់សិរីវុត្ថា បានបញ្ជាក់បន្ថែមថា៖ «ភ្ញៀវទេសចរដែលចូលមកកម្ពុជាមិនមែនមកតែពីតំបន់មជ្ឈិមបូព៌ាទាំងស្រុងនោះទេ។ ទោះជាយ៉ាងណា ការតភ្ជាប់ហោះហើរតាមរយៈ Hub នៅតំបន់នេះមានសារៈសំខាន់ខ្លាំងណាស់។ ប្រសិនបើមានការរំខាន វានឹងធ្វើឱ្យពេលវេលាធ្វើដំណើរយូរជាង និងឆ្ងាយជាង»។

អាកាសយានដ្ឋានសំខាន់ៗទាំង៧នៅឈូងសមុទ្រដែលអាចរងផលប៉ះពាល់រួមមាន៖ ឌូបៃ (DXB), ដូហា (DOH), អាប៊ូដាប៊ី (AUH), Sharjah (SHJ), គុយវ៉ែត (KWI), បារ៉ែន (BAH) និង Dubai World Central (DWC)។

យោងតាមការវាយតម្លៃដំបូង កម្ពុជាអាចរងផលប៉ះពាល់អវិជ្ជមានពីអ្នកដំណើរប្រមាណ ១២,៩៦០ នាក់ក្នុងមួយសប្ដាហ៍ និង ៥១,៨៤០ នាក់ក្នុងមួយខែ ប្រសិនបើសង្គ្រាមបន្តអូសបន្លាយ។

អ្នកជំនាញសេដ្ឋកិច្ចបានព្រមានថា ការកើនឡើងនៃតម្លៃប្រេងឥន្ទនៈនឹងប៉ះពាល់ដល់វិស័យដឹកជញ្ជូន កសិកម្ម ឧស្សាហកម្ម និងសេវាកម្មទាំងអស់ ដែលនឹងធ្វើឱ្យអតិផរណាកើនឡើង និងបង្កការលំបាកដល់ប្រជាពលរដ្ឋ។