By ខេត្តកំពង់ចាម – ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំវេទិកាការងារដ៏ធំមួយ ដោយនាំយកឱកាសការងារសរុបចំនួន ៩១៩ កន្លែង ទៅកាន់ខេត្តកំពង់ចាម សម្រាប់អតីតពលករខ្មែរ និងបងប្អូនដែលកំពុងស្វែងរកការងារ។
លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា៖ «វេទិកាការងារ និងយុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធនេះ នឹងរៀបចំនៅថ្ងៃទី១២ ខែមីនា ឆ្នាំ២០២៦ នៅវិទ្យាស្ថានពហុបច្ចេកទេសខេត្តកំពង់ចាម។ អតីតពលករខ្មែរ និងអ្នកស្វែងរកការងារ អាចចូលរួមចាប់ពីម៉ោង ៧:៣០ព្រឹក ដល់ម៉ោង ៤:០០ល្ងាច។»
កម្មវិធីនេះរៀបចំដោយទីភ្នាក់ងារជាតិមុខរបរ និងការងារ (NEA) ក្រោមការសហការជាមួយគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ការសហការនេះក៏ទទួលបានការគាំទ្រពីអង្គការអន្តរជាតិខាងការងារ (ILO) និងដៃគូអាជីវកម្មជាច្រើនផ្សេងទៀត។
អ្នកចូលរួមនឹងមានឱកាសដាក់ CV ភ្លាមៗ ទទួលសម្ភាសន៍ផ្ទាល់ជាមួយតំណាងក្រុមហ៊ុន និងទទួលបានព័ត៌មានអំពីដំណើរចុះឈ្មោះអ្នកសេដ្ឋកិច្ចក្រៅប្រព័ន្ធ។ បងប្អូនចាប់អារម្មណ៍អាចទាក់ទង NEA តាមលេខ ០១៧ ៤៦៧ ៤២៣ ឬ ០៨៨ ៩០៩ ៩៦៩៩ និងតាមគេហទំព័រ www.nea.gov.kh សម្រាប់ព័ត៌មានលម្អិត។
វេទិកាការងារនេះគឺជាឱកាសមួយដ៏ល្អសម្រាប់បងប្អូនអតីតពលករដែលបានត្រឡប់មកស្រុកកំណើត និងយុវជនដែលកំពុងស្វែងរកការងារនៅក្នុងស្រុក ដើម្បីចាប់យកឱកាសការងារដែលពេញចិត្ត និងអាចប្រឹក្សាផ្ទាល់ពីតំណាងក្រុមហ៊ុន។
