អង្គការសហប្រជាជាតិសម្រេចបញ្ឈប់ការវាយប្រហាររបស់អ៊ីរ៉ង់ តែទីក្រុងតេហេរ៉ង់ថា «មិនយុត្តិធម៌»

ក្រុមប្រឹក្សាសន្តិសុខអង្គការសហប្រជាជាតិ (UNSC) បានអនុម័តសេចក្តីសម្រេចមួយដែលទាមទារឲ្យអ៊ីរ៉ង់បញ្ឈប់ការវាយប្រហារលើប្រទេសជិតខាងក្នុងតំបន់ឈូងសមុទ្រភ្លាមៗ។ ការសម្រេចចិត្តនេះបានទទួលសំឡេងគាំទ្រចំនួន ១៣ និងសំឡេងអនុប្បវាទចំនួន ២។

សេចក្តីសម្រេចដែលអនុម័តនៅថ្ងៃទី១១ ខែមីនា អំពាវនាវឲ្យអ៊ីរ៉ង់បញ្ឈប់ការវាយប្រហារទាំងអស់លើប្រទេសបារ៉ែន គុយវ៉ែត អូម៉ង់ កាតា អារ៉ាប៊ីសាអូឌីត អារ៉ាប់រួម (UAE) និងហ្ស៊កដានី។ ឯកសារនេះក៏ថ្កោលទោសសកម្មភាពណាមួយរបស់អ៊ីរ៉ង់ក្នុងការរារាំងច្រកសមុទ្រហ័រមូស។

លោក Jamal Fares Alrowaiei ឯកអគ្គរដ្ឋទូតបារ៉ែនប្រចាំ UN បានអះអាងថា៖ «ការអនុម័តឯកសារនេះឆ្លុះបញ្ចាំងពីតួនាទីសំខាន់របស់តំបន់ឈូងសមុទ្រក្នុងសេដ្ឋកិច្ចពិភពលោក។ សន្តិសុខតំបន់នេះគឺជាការទទួលខុសត្រូវអន្តរជាតិរួមគ្នា។»

ទោះជាយ៉ាងណា អ៊ីរ៉ង់បានរិះគន់សេចក្តីសម្រេចនេះថា «មិនយុត្តិធម៌» និងអយុត្តិធម៌។ លោក Saeid Iravani ឯកអគ្គរដ្ឋទូតអ៊ីរ៉ង់បានចោទប្រកាន់ថា សេចក្តីសម្រេចនេះគ្រាន់តែជាឧបករណ៍បន្តនយោបាយរបស់អាមេរិក និងអ៊ីស្រាអែលប៉ុណ្ណោះ។

ចិន និងរុស្ស៊ីដែលបានអនុប្បវាទ ក៏បានសម្តែងការមិនពេញចិត្តចំពោះការមិនទទួលស្គាល់អរិភាពរបស់អាមេរិក និងអ៊ីស្រាអែលក្នុងសេចក្តីសម្រេចនេះដែរ។

រូបភាព៖ Reuters
អត្ថបទ៖ សាង ស្រីល័ក្ខ