By ខេត្តកំពង់ស្ពឺ៖ ស្ត្រីម្នាក់ដែលលួចខ្សែកមាសទម្ងន់២ជីពីកាបូបអ្នកធ្វើការជាមួយគ្នា យកទៅលក់នៅផ្សារត្រពាំងក្រឡឹង ត្រូវបាននគរបាលស្រុកភ្នំស្រួចឃាត់ខ្លួនបានបន្ទាប់ពីរំលងបានត្រឹមតែ៣ថ្ងៃប៉ុណ្ណោះ។
សមត្ថកិច្ចបានបញ្ជាក់ថា ជនសង្ស័យឈ្មោះ ង ផល្លា អាយុ២៩ឆ្នាំ រស់នៅភូមិក្រាំងប្រស្រុក ឃុំគីរីវន្ត បានលួចខ្សែកមាសពីស្ត្រីឈ្មោះ ម៉ក់ សូល អាយុ៣៧ឆ្នាំ ដែលជាអ្នកធ្វើការជាមួយគ្នានៅរោងចក្រកាត់ដេរវិចថូរី។
ព្រឹត្តិការណ៍នេះកើតឡើងនៅថ្ងៃទី៩ ខែមីនា ឆ្នាំ២០២៦ នៅពេលដែលស្ត្រីរងគ្រោះទុកខ្សែកមាសក្នុងកាបូបស្ពាយ ហើយទុកនៅលើតុធ្វើការ។ ជនសង្ស័យបានយកខ្សែកទៅលក់នៅផ្សារត្រពាំងក្រឡឹង និងទទួលបានទឹកប្រាក់១១៥០ដុល្លារ។
បន្ទាប់ពីដកហូតខ្សែកមាសបានវិញ សមត្ថកិច្ចបានប្រគល់វាឱ្យម្ចាស់ដើមវិញ។ ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកភ្នំស្រួច ហើយកំពុងត្រូវបានកសាងសំណុំរឿងដើម្បីចាត់ការតាមផ្លូវច្បាប់។
