អង្គការសហប្រជាជាតិព្រមាន៖ ការចំណាយសង្គ្រាមមួយថ្ងៃ១ពាន់លានដុល្លារ ខណៈថវិកាសង្គ្រោះមនុស្សកំពុងខ្វះខាតយ៉ាងធ្ងន់ធ្ងរ

អង្គការសហប្រជាជាតិ (UN) បានចេញសេចក្តីថ្លែងការណ៍ព្រមានយ៉ាងធ្ងន់ធ្ងរអំពីគ្រោះថ្នាក់ដ៏គួរឲ្យភ័យខ្លាច នៅពេលដែលការចំណាយលើសង្គ្រាមនៅតំបន់មជ្ឈិមបូព៌ាបានកើនឡើងដល់១ពាន់លានដុល្លារក្នុងមួយថ្ងៃៗ ប៉ុន្តែថវិកាសម្រាប់ជួយសង្គ្រោះជីវិតមនុស្សវិញ កំពុងស្ថិតក្នុងស្ថានភាពខ្វះខាតយ៉ាងខ្លាំង។

លោក Tom Fletcher ប្រធានផ្នែកសង្គ្រោះបន្ទាន់របស់ UN ដែលបានចេញសេចក្តីថ្លែងការណ៍នៅទីក្រុងហ្សឺណែវ បានលើកឡើងថា គម្រោងអំពាវនាវរកជំនួយទូទាំងពិភពលោកចំនួន២៣ពាន់លានដុល្លារ ដើម្បីជួយដល់ជនងាយរងគ្រោះបំផុត បច្ចុប្បន្នទទួលបានថវិកាមិនដល់មួយភាគបីនៃតម្រូវការនោះទេ។

“គ្រាន់តែថវិកាដែលគេយកទៅចំណាយលើសង្គ្រាមក្នុងរយៈពេលតែ១ថ្ងៃ១ពាន់លានដុល្លារ គឺអាចជួយសង្គ្រោះជីវិតមនុស្សរាប់លាននាក់នៅក្នុងតំបន់ដែលកំពុងត្រូវការជំនួយខ្លាំងបំផុតដូចជា នៅហ្គាហ្សា និងស៊ូដង់” លោក Fletcher បានសង្កត់ធ្ងន់។

វិបត្តិនេះកាន់តែអាក្រក់ទៅៗ បន្ទាប់ពីការបិទច្រកសមុទ្រ Hormuz កាលពីថ្ងៃទី២មីនា ដែលលោក Fletcher ព្រមានថា វាកំពុងធ្វើឲ្យតម្លៃអាហារ ថាមពល និងជីកសិកម្មនៅទូទាំងពិភពលោកហក់ឡើងខ្ពស់។ ច្រកសមុទ្រនេះ គឺជាផ្លូវដឹកជញ្ជូនប្រេងដល់ទៅ២០% នៃតម្រូវការសកល។

ក្រៅពីបញ្ហាថវិកា លោក Fletcher ក៏បានបង្ហើបពីក្តីបារម្ភអំពីសុវត្ថិភាពរបស់បុគ្គលិកជំនួយនៅតាមបណ្តាប្រទេសដូចជា ស៊ូដង់ លីបង់ និងកុងហ្គោ ដែលកំពុងរងការវាយប្រហារកាន់តែខ្លាំង។

ទោះបីជាត្រូវបំពេញការងារលើសកម្លាំង និងស្ថិតក្រោមការគំរាមកំហែងយ៉ាងណាក៏ដោយ លោក Fletcher បានអះអាងថា អង្គការសហប្រជាជាតិមិនបោះបង់បេសកកម្មរបស់ខ្លួនឡើយ ហើយលោកបានជំរុញឲ្យប្រទេសជាសមាជិកទាំងអស់ ផ្តល់អាទិភាពលើការការពារជនស៊ីវិល និងហេដ្ឋារចនាសម្ព័ន្ធចាំបាច់នានា។