ភាពសាហាវដល់ក្មេងស្រី! កងជីវពលស៊ូដង់ទម្លាក់ដ្រូនផ្ទុះវាយសាលារៀន សម្លាប់១៧នាក់

ភាពវឹកវរនៅស៊ូដង់បន្តកើនឡើង នៅពេលដែលកងជីវពលបានទម្លាក់ដ្រូនផ្ទុកសារធាតុផ្ទុះវាយប្រហារសាលារៀនមធ្យមសិក្សា និងមជ្ឈមណ្ឌលថែទាំសុខភាពនៅភាគខាងត្បូងប្រទេសនេះ។

អាជ្ញាធរ និងក្រុមគ្រូពេទ្យបានបញ្ជាក់ថា ការវាយប្រហារនេះបានសម្លាប់មនុស្សយ៉ាងហោចណាស់ ១៧ នាក់ ដោយភាគច្រើនជាក្មេងស្រីសិស្សសាលា។ ការវាយប្រហារបានកើតឡើងនៅភូមិ Shukeiri ក្នុងខេត្ត White Nile កាលពីថ្ងៃពុធ។

លោកវេជ្ជបណ្ឌិត Musa al-Majeri នាយកមន្ទីរពេទ្យ Douiem បានលើកឡើងថា មានមនុស្សយ៉ាងហោចណាស់ ១០ នាក់ទៀតបានរងរបួស ដោយក្មេងស្រី ៣ នាក់ស្ថិតក្នុងស្ថានភាពធ្ងន់ធ្ងរ។ ក្នុងចំណោមពួកគេ ពីរនាក់បានទទួលការវះកាត់នៅមន្ទីរពេទ្យ។

បណ្តាញគ្រូពេទ្យស៊ូដង់ដែលតាមដានសង្គ្រាមបានរាយការណ៍ថា អ្នកដែលត្រូវបានសម្លាប់មុនគេរួមមានគ្រូបង្រៀន ២ នាក់ និងបុគ្គលិកថែទាំសុខភាពម្នាក់។

ក្រុមគ្រូពេទ្យ និងលោក al-Majeri បានស្តីបន្ទោសកងកម្លាំងគាំទ្ររហ័សរបស់យោធាប៉ារ៉ា (RSF) ចំពោះការវាយប្រហារនេះ។ យ៉ាងណាក៏ដោយ RSF មិនបានឆ្លើយតបទៅនឹងសំណើសុំការអត្ថាធិប្បាយនៅឡើយទេ។

លោកវេជ្ជបណ្ឌិត Razan Al-Mahdi អ្នកនាំពាក្យក្រុមវេជ្ជសាស្ត្រ បានថ្លែងថា៖ «ឧក្រិដ្ឋកម្មដ៏គួរឱ្យរន្ធត់នេះតំណាងឱ្យមានសកម្មភាពបន្តនៃការរំលោភបំពានដែលប្រព្រឹត្តដោយ RSF នៅក្នុងខេត្ត White Nile។ កងជីវពលបានវាយប្រហារកន្លែងស្នាក់នៅស៊ីវិលជាច្រើនក្នុងរយៈពេលពីរថ្ងៃកន្លងមកនេះ រួមទាំងអន្តេវាសិកដ្ឋាននិស្សិត និងរោងចក្រថាមពលផងដែរ»។

គួរបញ្ជាក់ថា ការវាយប្រហារនៅភូមិ Shukeiri ក្នុងខេត្ត White Nile គឺជាការវាយប្រហារដ៏សាហាវចុងក្រោយបង្អស់ក្នុងសង្គ្រាមជិតបីឆ្នាំរបស់ប្រទេសស៊ូដង់។ ប្រទេសនេះបានធ្លាក់ចូលក្នុងភាពវឹកវរនៅខែមេសា ឆ្នាំ២០២៣ ពេលដែលការតស៊ូដណ្តើមអំណាចរវាងយោធា និង RSF បានផ្ទុះឡើងទៅជាការប្រយុទ្ធគ្នាដោយបើកចំហនៅទីក្រុង Khartoum និងកន្លែងផ្សេងទៀតក្នុងប្រទេស។