🔥អាវុធហត្ថសៀមរាប ឆ្លើយតបបន្ទាន់តាម Hotline 1296 ជួយពន្លត់ភ្លើងឆេះផ្ទះដោយសុវត្ថិភាព

សៀមរាប – កងរាជអាវុធហត្ថខេត្តសៀមរាប បានឆ្លើយតបបន្ទាន់ទៅកាន់ករណីភ្លើងឆេះផ្ទះមួយកន្លែង បន្ទាប់ពីទទួលបានការទាក់ទងតាមរយៈលេខទូរស័ព្ទបន្ទាន់ (Hotline) 1296 នាព្រឹកថ្ងៃទី១៣ ខែមីនា ឆ្នាំ២០២៦។

ហេតុការណ៍ភ្លើងឆេះនេះកើតឡើងនៅភូមិខ្នារ សង្កាត់ជ្រាវ ក្រុងសៀមរាប ដែលស្ថិតនៅក្រោយអង្គរអេរ៉ា។ ភ្លាមៗបន្ទាប់ពីទទួលដំណឹង កម្លាំងមូលដ្ឋានកងរាជអាវុធហត្ថក្រុងសៀមរាប រួមជាមួយកម្លាំងជំនាញពីកងរាជអាវុធហត្ថខេត្ត បានចូលរួមសហការជាមួយកម្លាំងនគរបាល និងអាជ្ញាធរដែលពាក់ព័ន្ធ ដើម្បីពន្លត់អគ្គិភ័យ។

យោងតាមការបញ្ជាក់ពីអាជ្ញាធរ ករណីភ្លើងឆេះនេះបណ្តាលមកពីឆ្លងចរន្តអគ្គិសនី ប៉ុន្តែជាសំណាងល្អដែលមិនបណ្តាលឱ្យមានការបាត់បង់ជីវិតមនុស្សឡើយ។

កងរាជអាវុធហត្ថខេត្តសៀមរាប បានអំពាវនាវឱ្យប្រជាពលរដ្ឋដែលជួបប្រទះហេតុការណ៍បន្ទាន់ផ្សេងៗ អាចទាក់ទងមកកាន់លេខ Hotline 1296 (ឥតគិតថ្លៃ ២៤ម៉ោង) ឬតាមរយៈបណ្តាញទំនាក់ទំនងផ្សេងៗដូចជា Telegram, WhatsApp, CoolApp តាមរយៈលេខ 088 93 94 567។

“ជានិច្ចជាកាល កងរាជអាវុធហត្ថយើងតែងតែយកចិត្តទុកដាក់ចេញអន្តរាគមន៍ជូនបងប្អូនប្រជាពលរដ្ឋ ពេលមានទុក្ខធុរៈផ្សេងៗក្នុងខេត្តសៀមរាប” ជាសារប្រកាសពីអាជ្ញាធរ។

ដោយ៖ សិលា