By ភ្នំពេញ៖ លោក Kim Chang Yong ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា បានសន្យាថា នឹងជួយជំរុញគម្រោងវិនិយោគធំៗឱ្យមកបណ្តាក់ទុននៅកម្ពុជា ដើម្បីសម្រេចសមិទ្ធផលកាន់តែច្រើន។ លោកក៏បានអញ្ជើញលោក ស៊ុន ចាន់ថុល ដឹកនាំគណៈប្រតិភូកម្ពុជា ទៅបំពេញទស្សនកិច្ចទាក់ទាញអ្នកវិនិយោគនៅប្រទេសកូរ៉េ។
ការថ្លែងនេះបានធ្វើឡើងក្នុងជំនួបសម្តែងការគួរសម និងពិភាក្សាការងាររវាងលោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) ជាមួយលោក Kim Chang Yong នៅថ្ងៃទី១២ ខែមីនា ឆ្នាំ២០២៦។
លោកឧបនាយករដ្ឋមន្ត្រី បានថ្លែងអំណរគុណចំពោះការគាំទ្រជាបន្តបន្ទាប់ពីសំណាក់រាជរដ្ឋាភិបាល និងប្រជាជនកូរ៉េ ចំពោះកិច្ចការអភិវឌ្ឍន៍សង្គម-សេដ្ឋកិច្ចកម្ពុជា។ ទំនាក់ទំនងពាណិជ្ជកម្ម និងការរីកលូតលាស់ក៏មានការកត់សម្គាល់យ៉ាងច្បាស់ក្នុងក្របខណ្ឌកិច្ចព្រមព្រៀងពាណិជ្ជកម្មសេរី (FTA) របស់ប្រទេសទាំងពីរ។
លោកឧបនាយករដ្ឋមន្រ្តី បានបង្ហាញនូវក្តីរីករាយ ដែលប្រទេសទាំងពីរបានលើកកម្រិតដៃគូទំនាក់ទំនងទ្វីភាគីទៅជា «ភាពជាដៃគូយុទ្ធសាស្ត្រ» កាលពីឆ្នាំ២០២៤។ លោកបានបន្តថា ទោះបីជាបច្ចុប្បន្នកម្ពុជា-កូរ៉េ មានកិច្ចសហការច្រើនវិស័យក្តី ក៏ប្រទេសទាំងពីរនៅតែមានសក្តានុពលខ្ពស់ក្នុងការបង្កើនទំនាក់ទំនង និងកិច្ចសហប្រតិបត្តិវិនិយោគបន្ថែមទៀត។
លោកឧបនាយករដ្ឋមន្រ្តី បានគូសបញ្ជាក់ជាថ្មីនូវការប្តេជ្ញាចិត្តរបស់រាជរដ្ឋាភិបាលកម្ពុជា ក្រោមការដឹកនាំបញ្ជាផ្ទាល់របស់សម្តេចមហាបវរធិបតី ហ៊ុន ម៉ាណែត ក្នុងការបោសសម្អាត Online Scam ឱ្យអស់ពីកម្ពុជា។ លោកក៏បានសម្តែងការអបអរសាទរចំពោះលទ្ធផលល្អប្រសើរនៃប្រតិបត្តិការបង្រ្កាប Online Scam ដែលអនុវត្តដោយក្រុមការងាររួមនៃប្រទេសទាំងពីរ។
ឯកអគ្គរដ្ឋទូតកូរ៉េ បាននាំមកនូវការថ្លែងអំណរគុណពីសំណាក់លោកប្រធានាធិបតីកូរ៉េ ចំពោះរាជរដ្ឋាភិបាលកម្ពុជា ដែលបានផ្តល់កិច្ចសហការយ៉ាងជិតស្និទ្ធក្នុងការប្រយុទ្ធប្រឆាំង Online Scam។ លោកក៏បានស្នើសុំឱ្យលោកឧបនាយករដ្ឋមន្ត្រី ចូលរួមសម្របសម្រួលក្នុងការរៀបចំខួប៣០ឆ្នាំនៃការភ្ជាប់ទំនាក់ទំនងការទូតឡើងវិញរវាងកម្ពុជា និងសាធារណរដ្ឋកូរ៉េនៅឆ្នាំក្រោយ។
លោកឯកអគ្គរដ្ឋទូត បានសន្យាថា នឹងជំរុញគម្រោងវិនិយោគធំៗឱ្យមកបណ្តាក់ទុននៅកម្ពុជា និងបានអញ្ជើញឯកឧត្តមឧបនាយករដ្ឋមន្រ្តីដឹកនាំគណៈប្រតិភូ ទៅទស្សនកិច្ចទាក់ទាញអ្នកវិនិយោគនៅប្រទេសកូរ៉េ។
កិច្ចសន្ទនាលើកទី៣ រវាងរដ្ឋនឹងផ្នែកឯកជន កម្ពុជា-កូរ៉េ នឹងត្រូវរៀបចំនៅថ្ងៃទី៨ ខែមេសា ខាងមុខនេះ។
