វិបត្តិមនុស្សធម៌ធំបំផុតនៅអ៊ីរ៉ង់៖ មនុស្សជាង៣លាននាក់រត់គេចពីសង្រ្គាម

អង្គការសហប្រជាជាតិបានចេញសេចក្តីព្រមានអាសន្នថា មនុស្សជាង៣,២លាននាក់ត្រូវបានបង្ខំចិត្តបោះបង់ផ្ទះសម្បែង និងភៀសខ្លួននៅទូទាំងប្រទេសអ៊ីរ៉ង់ ដោយសារការប្រយុទ្ធគ្នាកាន់តែរីករាលដាលខ្លាំង។

តាមការវាយតម្លៃបឋមរបស់ទីភ្នាក់ងារព័ត៌មានរ៉យទ័រ គ្រួសារចន្លោះពី៦០ម៉ឺនទៅ១លានគ្រួសារ បានសម្រេចចិត្តរត់គេចចេញពីទីក្រុងតេហេរ៉ង់ និងទីក្រុងធំៗផ្សេងទៀត ដើម្បីទៅរកទីជម្រកសុវត្ថិភាពនៅតាមបណ្តាខេត្តភាគខាងជើង និងតំបន់ជនបទដាច់ស្រយាល។

លោក Ayaki Ito អ្នកសម្របសម្រួលផ្នែកគ្រាអាសន្ននៃទីភ្នាក់ងារជនភៀសខ្លួនអង្គការសហប្រជាជាតិ (UNHCR) ប្រចាំតំបន់មជ្ឈិមបូព៌ា បានលើកឡើងថា៖ “ចំនួនអ្នកភៀសខ្លួននេះនឹងបន្តកើនឡើងបន្ថែមទៀត ដរាបណាសង្រ្គាមនៅតែបន្តឆាបឆេះ។ នេះគឺជាការកើនឡើងនូវតម្រូវការមនុស្សធម៌យ៉ាងគួរឲ្យព្រួយបារម្ភបំផុត។”

អ្វីដែលកាន់តែអាក្រក់នោះគឺ វិបត្តិនេះកំពុងវាយប្រហារយ៉ាងខ្លាំងដល់ជនភៀសខ្លួនដែលមានស្រាប់នៅក្នុងប្រទេសអ៊ីរ៉ង់ ជាពិសេសគឺជនជាតិអាហ្វហ្គានីស្ថាន។ លោក Ito បានពន្យល់ថា គ្រួសារទាំងនោះគឺជាក្រុមដែលងាយរងគ្រោះបំផុត ព្រោះពួកគេមានស្ថានភាពរស់នៅលំបាកស្រាប់ និងខ្វះខាតបណ្តាញគាំទ្រ។

ដើម្បីឆ្លើយតបនឹងវិបត្តិដ៏ធំនេះ UNHCR កំពុងតែមមាញឹកក្នុងការកែសម្រួលប្រតិបត្តិការរបស់ខ្លួន និងសហការជាមួយអាជ្ញាធរក្នុងស្រុក។ អង្គការសហប្រជាជាតិក៏បានអំពាវនាវយ៉ាងទទូចដល់ភាគីជម្លោះទាំងអស់ ឲ្យមេត្តាការពារអាយុជីវិតជនស៊ីវិល និងបើកផ្លូវឲ្យជំនួយមនុស្សធម៌អាចចូលទៅដល់អ្នកដែលកំពុងត្រូវការបំផុត។