ចាប់ខ្លួនជនជាតិវៀតណាម ១៥នាក់ ស្នាក់នៅខុសច្បាប់ក្នុងភ្នំពេញ

កម្លាំងគណៈបញ្ជាការឯកភាពរាជធានីភ្នំពេញ បានចាប់ខ្លួនជនជាតិវៀតណាមចំនួន ១៥នាក់ ដែលស្នាក់នៅខុសច្បាប់នៅក្នុងខណ្ឌច្បារអំពៅ។ ប្រតិបត្តិការនេះបានធ្វើឡើងនៅម៉ោង ១រសៀលថ្ងៃទី១១ ខែមីនា ឆ្នាំ២០២៦។

តាមការបញ្ជាក់ពីកម្លាំងជំនាញ ការចុះត្រួតពិនិត្យនេះធ្វើឡើងតាមការណែនាំពីលោក ឃួង ស្រេង អភិបាលរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ។

ជនជាតិវៀតណាមទាំង ១៥នាក់នេះ ត្រូវបានរកឃើញនៅផ្ទះល្វែងមួយក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ។ តាមការសួរនាំជាបឋម ពួកគេបានចូលមកតាមច្រកបាវិត ហើយទើបតែស្នាក់នៅបាន ២យប់ប៉ុណ្ណោះ។

បច្ចុប្បន្ន ជនសង្ស័យទាំងអស់ត្រូវបានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តតាមនីតិវិធីច្បាប់។ ការចុះត្រួតពិនិត្យនេះគឺជាផ្នែកមួយនៃយុទ្ធនាការបង្ក្រាបបទល្មើសនានាក្នុងរាជធានី។

កម្លាំងសមត្ថកិច្ចបន្តពង្រឹងការត្រួតពិនិត្យលើទីតាំងសង្ស័យនានា ដើម្បីធានាសុខសន្តិសុខសុវត្ថិភាពដល់ប្រជាពលរដ្ឋ។