តំបន់មេគង្គ-ឡានឆាង បង្កើតសមរភូមិថ្មីប្រយុទ្ធប្រឆាំងព័ត៌មានក្លែងក្លាយ

(រាជធានីភ្នំពេញ)៖ ក្នុងយុគសម័យឌីជីថលដែលព័ត៌មានមិនពិតអាចផ្សព្វផ្សាយយ៉ាងរហ័ស ប្រទេសចំនួន៥ក្នុងតំបន់មេគង្គ រួមមាន កម្ពុជា ចិន វៀតណាម ឡាវ និងភូមា(មីយ៉ាន់ម៉ា) បានរួមដៃគ្នាបង្កើតរបាំងការពារប្រឆាំងព័ត៌មានក្លែងក្លាយ។

កិច្ចសហប្រតិបត្តិការសំខាន់នេះត្រូវបានប្រកាសដោយឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងពិធីបើកសម្ពោធគម្រោងមេគង្គ-ឡានឆាង ដំណាក់កាលទី២ នាថ្ងៃទី១២ មីនា ២០២៦។

យុទ្ធនាការដំណាក់កាលទី២នេះជាការបោះជំហានពីកម្មវិធីអប់រំក្នុងស្រុក «និយាយថាទេចំពោះព័ត៌មានក្លែងក្លាយ» ទៅកាន់ការអនុវត្តជាលក្ខណៈតំបន់។ ក្រោមជំនួយពីចិន កម្ពុជានឹងសហការជាមួយប្រទេសជិតខាងដើម្បីពង្រឹងការទូតព័ត៌មាន និងគ្រប់គ្រងលំហឌីជីថល។

តាមផែនការ ក្រសួងព័ត៌មាននឹងបើកយុទ្ធនាការនេះជាផ្លូវការនៅខែឧសភា ២០២៦ ដោយផ្តោតលើការបង្កើនការយល់ដឹងដល់សាធារណជនតាមរយៈសារសំឡេង និងអក្សរក្នុងប្រព័ន្ធផ្សព្វផ្សាយ។ លើសពីនេះ នឹងមានការបង្កើតក្រុមយុវជនស្ម័គ្រចិត្តប្រឆាំងព័ត៌មានក្លែងក្លាយក្នុងតំបន់។

យុទ្ធនាការនេះមិនត្រឹមតែការពារប្រឆាំងព័ត៌មានមិនពិតប៉ុណ្ណោះទេ ថែមទាំងជាស្ពានតភ្ជាប់ទំនាក់ទំនងរវាងប្រជាជនក្នុងតំបន់ ដើម្បីរួមគ្នាកសាងសន្តិភាព និងវិបុលភាព៕