គុយបាបើកកិច្ចពិភាក្សាផ្លូវការជាមួយអាមេរិក ក្រោយតានតឹងខ្លាំងពីការបិទច្រកប្រេង

ប្រធានាធិបតីគុយបា លោក Miguel Diaz-Canel បានប្រកាសថា មន្ត្រីរបស់លោកបានចាប់ផ្តើមកិច្ចពិភាក្សាផ្លូវការជាមួយតំណាងរដ្ឋាភិបាលសហរដ្ឋអាមេរិក នៅពេលដែលទីក្រុង Havana កំពុងប្រឈមមុខនឹងវិបត្តិសេដ្ឋកិច្ចធ្ងន់ធ្ងរ។

លោក Miguel បានថ្លែងតាមទូរទស្សន៍ជាតិថា៖ «ការពិភាក្សាទាំងនេះតម្រូវឱ្យមានការខិតខំប្រឹងប្រែងយ៉ាងខ្លាំង ដើម្បីស្វែងរកដំណោះស្រាយ និងចំណុចរួម ដែលធ្វើឱ្យដំណើរការនេះអាចរីកចម្រើន និងចៀសវាងការប្រឈមមុខដាក់គ្នា»។

កិច្ចពិភាក្សានេះកើតឡើងក្រោយពីទំនាក់ទំនងរវាងប្រទេសទាំងពីរមានភាពតានតឹងខ្លាំង ដោយសារទីក្រុងវ៉ាស៊ីនតោនបានរារាំងការដឹកជញ្ជូនប្រេងស្ទើរតែទាំងអស់ទៅកាន់គុយបា បណ្តាលឱ្យមានការខ្វះខាតប្រេងឥន្ធនៈធ្ងន់ធ្ងរ។

អង្គការសហប្រជាជាតិបានព្រមានអំពីហានិភ័យនៃវិបត្តិមនុស្សធម៌ ប្រសិនបើតម្រូវការថាមពលរបស់គុយបាមិនត្រូវបានធានា។ ប្រធានាធិបតីគុយបាបានសង្កត់ធ្ងន់ថា កិច្ចពិភាក្សាទាំងនេះមានគោលបំណងស្វែងយល់ពីវិស័យសហប្រតិបត្តិការ ដើម្បីធានាសន្តិសុខ និងសន្តិភាពសម្រាប់ប្រទេសទាំងពីរ។