កម្លាំងសមត្ថកិច្ចបាត់ដំបងបង្ក្រាបក្រុមក្មេង៩នាក់ជិះម៉ូតូបង្ហោះអនាធិបតេយ្យ

ខេត្តបាត់ដំបង៖ កម្លាំងសមត្ថកិច្ចបានធ្វើប្រតិបត្តិការបង្ក្រាបក្រុមក្មេងទំនើងចំនួន៩នាក់ ដែលជិះម៉ូតូបង្ហោះយ៉ាងអនាធិបតេយ្យនៅក្នុងស្រុកបាណន់ កាលពីថ្ងៃទី១២ មីនា ឆ្នាំ២០២៦។

តាមរបាយការណ៍ពីលោក ហេង បារាំង អធិការស្រុកបាណន់ ក្រុមក្មេងទំនើងទាំង៩នាក់នេះត្រូវបានបែងចែកជា២ក្រុមដាច់ដោយឡែកពីគ្នា។ ក្រុមទី១មាន៦នាក់ ជិះម៉ូតូ៣គ្រឿង ពាក់ឯកសណ្ឋានអាវខ្មៅ ហើយក្រុមទី២មាន៣នាក់ ជិះម៉ូតូ២គ្រឿង ពាក់ខោអាវកីឡាពណ៌ក្រហម។

ក្រុមក្មេងទំនើងទាំង៦នាក់ដែលមកពីខេត្តប៉ៃលិន បានធ្វើសកម្មភាពបង្ហោះម៉ូតូនៅក្នុងភូមិតាគ្រាម ឃុំតាគ្រាម ស្រុកបាណន់។ ពួកគេមានឈ្មោះជាបញ្ជី៖ ខាន់ សុខឃីម (១៧ឆ្នាំ), វ៉ានន៉ សំណាង (១៦ឆ្នាំ), នឿន ចាន់នុ (១៦ឆ្នាំ), ភួង ប៊ុនធឿន (១៧ឆ្នាំ), ម៉េត សាម៉ុត (១៧ឆ្នាំ) និង បូ មករា (១៧ឆ្នាំ)។

ចំណែកក្រុមទី២ដែលមាន៣នាក់ បានធ្វើសកម្មភាពបង្ហោះម៉ូតូនៅភូមិប៉ោយស្វាយ ឃុំតាគ្រាម កាលពីល្ងាចថ្ងៃទី១១ មីនា។ ពួកគេមានឈ្មោះ៖ ហ៊ុំ ជីវ៉ាត់ (២២ឆ្នាំ), គឹម លិ (១៩ឆ្នាំ) និង គល់ យ៉ុង (១៤ឆ្នាំ)។

លោកអធិការស្រុកបាណន់បានបញ្ជាក់ថា ក្រោយពីឃាត់ខ្លួនបានសម្រេច សមត្ថកិច្ចបានអញ្ជើញអាណាព្យាបាលរបស់ក្មេងទំនើងទាំង៩នាក់មកជួបមុខកូនៗ និងបានធ្វើការអប់រំណែនាំចំពោះមុខអាណាព្យាបាល។ ក្មេងទំនើងទាំងនោះបានលើកដៃសំពះសុំទោសឪពុកម្ដាយ និងសន្យាថានឹងឈប់ប្រព្រឹត្តទង្វើខុសច្បាប់។

មុនពេលដោះលែង សមត្ថកិច្ចបានបង្គាប់ឲ្យក្រុមជនទំនើងទាំង៩នាក់ធ្វើកិច្ចសន្យា ដោយមានការធានាពីអាណាព្យាបាល ទើបពួកគេត្រូវបានអនុញ្ញាតឲ្យត្រឡប់ទៅផ្ទះវិញ។ ចំណែកម៉ូតូដែលជាមធ្យោបាយបង្កបទល្មើស ត្រូវសមត្ថកិច្ចដកហូតរក្សាទុកជាបណ្ដោះអាសន្នរយៈពេល៣ខែសិន។

សកម្មភាពបង្ក្រាបនេះបានធ្វើឡើងតាមគោលការណ៍របស់លោកស្នងការខេត្តបាត់ដំបង ដើម្បីរក្សាសន្តិសុខសាធារណៈ និងការពារអតិថិជនពីគ្រោះថ្នាក់ចរាចរណ៍។