By ខេត្តបាត់ដំបង៖ ក្រុមជាងសាងសង់ផ្ទះចំនួន ៥នាក់ ដែលបែរជាបន្ថែមមុខរបរជួញដូរថ្នាំញៀន ត្រូវសមត្ថកិច្ចចាប់ខ្លួនជាក់ស្ដែង នៅកន្លែងធ្វើការងាររបស់ពួកគេ កាលពីរសៀលថ្ងៃទី១៣ មីនា នៅស្រុកបាណន់។
យោងតាមអធិការស្រុកបាណន់ ក្រុមជាងទាំងនេះមានមុខរបរសាងសង់ផ្ទះ ប៉ុន្តែដោយសារចំណេញតិច ពួកគេបានបែកគំនិតបន្ថែមមុខរបរជួញដូរថ្នាំញៀន។ ពួកគេត្រូវបានចាប់ខ្លួនក្នុងពេលកំពុងប្រព្រឹត្តបទល្មើសជាក់ស្ដែង និងដកហូតបានវត្ថុតាងជាច្រើន។
ជនសង្ស័យទាំង ៥នាក់មាន៖ ជ័យ វិសាល (៣៩ឆ្នាំ), ស៊ុំ មិនា (៣៨ឆ្នាំ), ធឿន ហ៊ា (៣៣ឆ្នាំ), រី រ៉េន (៤០ឆ្នាំ) និង សួង ធេន (៣៥ឆ្នាំ)។ ពួកគេទាំងអស់រស់នៅក្នុងស្រុកបាណន់។
សមត្ថកិច្ចបានដកហូតបានវត្ថុតាងរួមមាន៖ ថ្នាំញៀនប្រភេទ ICE (ម៉ាទឹកកក) ៥ថង់, ជញ្ជីងសម្រាប់ថ្លឹងថ្នាំញៀន ១គ្រឿង, ថង់សម្រាប់ច្រកថ្នាំញៀន និងសម្ភារសម្រាប់ប្រើប្រាស់ថ្នាំញៀនផ្សេងៗទៀត។
តាមការបញ្ជាក់ពីមន្ត្រីជំនាញ ក្រុមនេះមិនត្រឹមតែជួញដូរថ្នាំញៀនទេ ថែមទាំងជាអ្នកសេបថ្នាំញៀនផ្ទាល់ខ្លួនផងដែរ។ បច្ចុប្បន្ន មន្ត្រីជំនាញកំពុងសួរនាំ ដើម្បីចាត់ការតាមនីតិវិធីច្បាប់។
