By កម្លាំងនគរបាលក្រុងតាខ្មៅ សហការជាមួយនគរបាលប៉ុស្ដិ៍សិត្បូ បានឃាត់ខ្លួនក្មេងទំនើងចំនួនពីរនាក់ដែលជាសិស្សសាលា ក្រោយពីបានធ្វើសកម្មភាពវាយបំផ្លាញផ្ទះប្រជាពលរដ្ឋនៅភូមិព្រែកត្រែង សង្កាត់សិក្យូ ក្រុងតាខ្មៅ។
ការឃាត់ខ្លួនបានធ្វើឡើងនៅថ្ងៃទី១១ ខែមីនា ឆ្នាំ២០២៦ បន្ទាប់ពីក្រុមក្មេងទំនើងទាំងនេះបានធ្វើអនាធិបតេយ្យវាយបំផ្លាញផ្ទះបណ្ដាលឲ្យខូចខាតបែកកញ្ចក់។ ជនសង្ស័យទាំងពីរមានអាយុ១៥ឆ្នាំ និងជាសិស្សសាលា។
ជនសង្ស័យទីមួយមានឈ្មោះ ជា សូយស៊ីន ទីលំនៅភូមិព្រែកតាឯក ឃុំត្រើយស្លា ស្រុកស្អាង។ ជនសង្ស័យទីពីរឈ្មោះ គ្រុយ ជាវ៉ាន់ ហៅ ហែង ទីលំនៅភូមិក្បាលកោះតូច ឃុំតាលន់ ស្រុកស្អាង។ ជនទាំងពីរត្រូវបានធ្វើតេស្តសារធាតុញៀនហើយបានលទ្ធផលអវិជ្ជមាន។
តាមរបាយការណ៍នគរបាល ក្រុមក្មេងទំនើងទាំងនេះបានធ្វើសកម្មភាពដោយមានដាវ និងកាំបិត ហើយបានចូលមករកវាយកូនរបស់ម្ចាស់ផ្ទះដល់ផ្ទះតែម្ដង។ ពួកគេក៏បានមកធ្វើសកម្មភាពស្រដៀងគ្នានេះម្ដងហើយម្ដងទៀតកាលពីប៉ុន្មានថ្ងៃមុន។
កម្លាំងនគរបាលបានស្គាល់អត្តសញ្ញាណជនសង្ស័យតាមរយៈកាមេរ៉ាសុវត្ថិភាព ហើយបច្ចុប្បន្នកំពុងតាមស្រាវជ្រាវក្រុមបក្ខពួកផ្សេងទៀតដើម្បីចាប់យកមកអនុវត្តនីតិវិធី។ សំណុំរឿងត្រូវបានកសាងរួច និងបញ្ជូនទៅអយ្យការអមសាលាដំបូងខេត្តកណ្តាលដើម្បីចាត់ការតាមច្បាប់។
ម្ចាស់ផ្ទះដែលជាជនរងគ្រោះបានឲ្យដឹងថា ក្រុមក្មេងទំនើងទាំងនេះហាក់មិនមានការខ្លាចញញើតច្បាប់ទម្លាប់ទាល់តែសោះ នៅពេលធ្វើសកម្មភាពរបស់ពួកគេ។
