អាមេរិកដាក់ពង្រាយកងទ័ពជើងទឹក ៥,០០០នាក់ និងនាវាចម្បាំង ៣គ្រឿងទៅមជ្ឈិមបូព៌ា ប្រឆាំងអ៊ីរ៉ង់

អាមេរិកបានដាក់ពង្រាយកងទ័ពជើងទឹក និងនាវិកចំនួន ៥,០០០នាក់ រួមជាមួយនាវាចម្បាំង ៣គ្រឿង ទៅកាន់តំបន់មជ្ឈិមបូព៌ា ក្នុងវិធានការប្រឆាំងនឹងអ៊ីរ៉ង់។

យោងតាមការផ្សាយរបស់ NBC News កាលពីថ្ងៃសុក្រ ទី១៣ ខែមីនា ឆ្នាំ២០២៦ កងកម្លាំងទាំងនេះជាអង្គភាពបេសកកម្មជើងទឹក (ARG/MEU) ដែលបានត្រៀមខ្លួនរួចរាល់សម្រាប់ប្រតិបត្តិការនានា។

ក្នុងកងកម្លាំងទាំងនេះ មានទាហានជើងទឹក ២,៥០០នាក់ និងនាវិក ២,៥០០នាក់។ កងទាហានជើងទឹក MEU ត្រូវបានបណ្តុះបណ្តាលជាពិសេសសម្រាប់ការឆ្លើយតបទៅនឹងវិបត្តិ រួមមានការជម្លៀសចេញពីតំបន់គ្រោះថ្នាក់ និងការការពារស្ថានទូត។

នាវិកទាំងនេះមកពីក្រុម Tripoli Amphibious Ready Group ដែលមាននាវាចម្បាំង USS San Diego, USS Tripoli និង USS New Orleans។ នាវាទាំងនេះទើបតែបានប្រតិបត្តិការនៅសមុទ្រហ្វីលីពីន ហើយបច្ចុប្បន្នកំពុងធ្វើដំណើរឆ្ពោះទៅទិសខាងលិចវិញ។

មន្ត្រីអាមេរិកម្នាក់នៅមជ្ឈមណ្ឌលបញ្ជាការកណ្តាល (CENTCOM) បានបញ្ជាក់ថា ការស្នើសុំកងកម្លាំងបន្ថែមនេះគឺជាផ្នែកមួយនៃផែនការសម្រាប់សង្គ្រាមនៅអ៊ីរ៉ង់ ដែលត្រូវការកងកម្លាំងជើងទឹកដើម្បីផ្តល់ជម្រើសសម្រាប់ប្រតិបត្តិការ។

ទោះជាយ៉ាងណា មន្ត្រីមន្ទីរបញ្ចកោណបានបដិសេធមិនផ្តល់ការអត្ថាធិប្បាយអំពីការដាក់ពង្រាយកងកម្លាំងទាំងនេះ ដោយលើកហេតុផលសន្តិសុខប្រតិបត្តិការ។