By ប្រធានាធិបតីបារាំង លោក អេម៉ានូអែល ម៉ាក្រុង បានបញ្ជាក់ពីការបាត់បង់ជីវិតទាហានបារាំងម្នាក់ និងទាហាន៦នាក់ទៀតរងរបួស ក្នុងការវាយប្រហារមួយនៅតំបន់អ៊ែរប៊ីល ប្រទេសអ៊ីរ៉ាក់។
ការវាយប្រហារនេះកើតឡើងក្នុងពេលដែលភាពតានតឹងនៅតំបន់មជ្ឈិមបូព៌ាកំពុងកើនឡើងខ្ពស់ បន្ទាប់ពីការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់។ ក្រុមគាំទ្រអ៊ីរ៉ង់នៅក្នុងតំបន់បានធ្វើសកម្មភាពវាយប្រហារលើមូលដ្ឋានទ័ពអន្តរជាតិ។
លោក ម៉ាក្រុង បានបង្ហោះនៅលើបណ្តាញសង្គម X ថា៖ «សមាជិកកងកម្លាំងប្រដាប់អាវុធរបស់ប្រទេសបារាំងម្នាក់ស្លាប់ អំឡុងពេលមានការវាយប្រហារមួយនៅក្នុងតំបន់ Erbil នៃប្រទេសអ៊ីរ៉ាក់ និងមានទាហានជាច្រើននាក់ផ្សេងទៀតរងរបួសផងដែរ»។
ទោះបីជាលោកម៉ាក្រុងបដិសេធមិនបកស្រាយលម្អិតពីក្រុមដែលនៅពីក្រោយការវាយប្រហារក៏ដោយ ក៏មេបញ្ជាការយោធាបារាំងបានបង្ហាញថា ការវាយប្រហារបានធ្វើឡើងលើមូលដ្ឋានមួយដែលកងទ័ពកំពុងចូលរួមក្នុងការហ្វឹកហ្វឺនប្រឆាំងភេរវកម្មជាមួយសមភាគីអ៊ីរ៉ាក់។
«សង្គ្រាមនៅអ៊ីរ៉ង់មិនបង្ហាញពីភាពត្រឹមត្រូវនៃការវាយប្រហារបែបនេះបានទេ។ យើងមិនអាចទទួលយកបាន» នេះជាប្រតិកម្មរបស់លោកម៉ាក្រុងចំពោះការវាយប្រហារ។
គួរកត់សម្គាល់ថា ទាហានអន្តរជាតិជាច្រើន រួមទាំងអ៊ីតាលី និងបារាំង កំពុងបណ្តុះបណ្តាលក្នុងតំបន់ឃឺដ ប្រទេសអ៊ីរ៉ាក់ ដែលជាផ្នែកមួយនៃសម្ព័ន្ធមិត្តប្រឆាំងក្រុមជីហា។
លោកម៉ាក្រុងបានបញ្ជាក់ជំហរថា បារាំងនឹងនៅជាមួយប្រទេសក្នុងមជ្ឈិមបូព៌ា និងបន្តការពារពួកគេយ៉ាងតឹងរ៉ឹង។
