ត្រាំបញ្ចេញសារមិនស៊ីសង្វាក់គ្នាជុំវិញសង្គ្រាមអ៊ីរ៉ង់ បង្ហាញសម្ពាធនយោបាយ-សេដ្ឋកិច្ច

ភាពមិនច្បាស់លាស់កំពុងគ្របដណ្ដប់លើទិសដៅសង្គ្រាមរវាងអាមេរិក-អ៊ីស្រាអែល និងអ៊ីរ៉ង់ ដែលបានអូសបន្លាយជាង១០ថ្ងៃមកហើយ។ ប្រធានាធិបតីដូណាល់ ត្រាំ បន្តបញ្ចេញសារមិនស៊ីសង្វាក់គ្នាទាក់ទងនឹងប្រតិបត្តិការយោធានេះ។

កាលពីថ្មីៗនេះ លោកត្រាំបានប្រកាសថា «សន្តិភាពអាចសម្រេចបានក្នុងពេលឆាប់ៗនេះ» ប៉ុន្តែក្រោយមកលោកផ្ទាល់បានព្រមានវិញថា «ការប្រយុទ្ធគ្នាអាចខ្លាំងក្លាជាងមុន និងមានរយៈពេលយូរជាងនេះ»។ ភាពផ្ទុយគ្នានេះបង្ហាញពីសម្ពាធនយោបាយ សេដ្ឋកិច្ច និងការគណនាយុទ្ធសាស្ត្រដ៏ស្មុគស្មាញ។

នៅក្នុងបទសម្ភាសន៍ជាមួយ Axios លោកត្រាំបាននិយាយថា «មានរឿងតូចតាចមួយចំនួនតូចប៉ុណ្ណោះ ដែលនៅសល់ដើម្បីវាយប្រហារអ៊ីរ៉ង់ ហើយសង្គ្រាមអាចបញ្ចប់នៅពេលណាដែលខ្ញុំចង់បាន»។ ទោះជាយ៉ាងណា នៅល្ងាចថ្ងៃដដែលនោះ លោកបាននិយាយម្តងទៀតថា សហរដ្ឋអាមេរិកនឹងបន្តប្រតិបត្តិការយោធារហូតដល់ភារកិច្ចត្រូវបំពេញពេញលេញ។

យោងតាមអ្នកអត្ថាធិប្បាយ CNN លោក Stephen Collinson ភាពមិនស៊ីសង្វាក់គ្នានេះឆ្លុះបញ្ចាំងពីសម្ពាធនយោបាយ និងយោធាដែលប្រធានាធិបតីកំពុងប្រឈមមុខ។ សង្គ្រាមនេះបានជះឥទ្ធិពលយ៉ាងខ្លាំងទៅលើសេដ្ឋកិច្ចពិភពលោក ដោយតម្លៃប្រេងកើនឡើងលើសពី១០០ដុល្លារក្នុងមួយបារ៉ែល និងទីផ្សារភាគហ៊ុនពិភពលោកធ្លាក់ចុះយ៉ាងខ្លាំង។

ផលវិបាកសេដ្ឋកិច្ចទាំងនេះជាហេតុផលសំខាន់ដែលត្រាំត្រូវធានាទីផ្សារឡើងវិញ។ លោកបានសង្កត់ធ្ងន់ថា សហរដ្ឋអាមេរិក «នាំមុខគេយ៉ាងខ្លាំង» និងបានពិពណ៌នាអំពីប្រតិបត្តិការប្រឆាំងនឹងអ៊ីរ៉ង់ថា ជាជ័យជម្នះសេដ្ឋកិច្ច។

ទោះជាយ៉ាងណាក៏ដោយ លោក Collinson មិនបានច្រានចោលលទ្ធភាពដែលត្រាំនឹងបង្ហោះសារដែលមិនស៊ីសង្វាក់គ្នាដើម្បីរំខានដល់គូប្រជែងរបស់លោកនោះទេ។ ទីក្រុងតេហេរ៉ង់អាចមានការលំបាកក្នុងការកំណត់ចេតនាពិតរបស់ទីក្រុងវ៉ាស៊ីនតោន។

ប្រភពខ្លះបាននិយាយថា អាមេរិកកំពុងពិចារណាជម្រើសស្មុគស្មាញជាងនេះ រួមទាំងការធ្វើប្រតិបត្តិការពិសេសមួយដែលកំណត់គោលដៅសមាសធាតុសំខាន់ៗនៃកម្មវិធីនុយក្លេអ៊ែររបស់អ៊ីរ៉ង់។

អត្ថបទ៖ សាង ស្រីល័ក្ខ