ទំនប់វារីអគ្គិសនីសេសានក្រោម២ ឈរជាប្រភពថាមពលធំបំផុតកម្ពុជា ផលិតបាន ៤០០ មេហ្គាវ៉ាត់

ខេត្តស្ទឹងត្រែង – ទំនប់វារីអគ្គិសនីសេសានក្រោម២ បានក្លាយជានិមិត្តរូបថ្មីនៃថាមពលជាតិ ដោយមានសមត្ថភាពផលិតអគ្គិសនីដល់ ៤០០ មេហ្គាវ៉ាត់ ដែលធ្វើឱ្យវាក្លាយជាទំនប់វារីអគ្គិសនីធំជាងគេបំផុតនៅកម្ពុជា។

លោក ម៉ែន គុង អភិបាលរងខេត្តស្ទឹងត្រែង បានបង្ហាញមោទនភាពក្នុងការគ្រប់គ្រងប្រភពថាមពលយក្សនេះ ដែលជាឆ្អឹងខ្នងសំខាន់សម្រាប់ស្ថិរភាពអគ្គិសនីជាតិ។ តួលេខ ៤០០ មេហ្គាវ៉ាត់នេះ បានដាក់វានៅលំដាប់លេខ១ នាំមុខទំនប់ស្ទឹងតាតៃ និងកំចាយ។

គម្រោងដែលមានតម្លៃវិនិយោគ ៨០០ លានដុល្លារ ត្រូវបានសាងសង់នៅចំណុចប្រសព្វទន្លេសេសាន និងទន្លេស្រែពក ក្នុងស្រុកសេសាន។ លក្ខណៈពិសេសរួមមាន តួប៊ីនយក្ស ៨ គ្រាប់ (មួយគ្រាប់ ៥០ មេហ្គាវ៉ាត់) និងទំនប់ប្រវែង ៦.៥ គីឡូម៉ែត្រ។

ថាមពលដ៏ធំនេះមិនត្រឹមតែបម្រើខេត្តស្ទឹងត្រែងប៉ុណ្ណោះទេ ថែមទាំងត្រូវបានបញ្ជូនទៅភ្នំពេញ និងខេត្តផ្សេងៗទៀត ដើម្បីជំរុញឧស្សាហកម្ម និងកាត់បន្ថយការនាំចូលថាមពលពីប្រទេសជិតខាង។

ទន្ទឹមនឹងការផលិតថាមពល អាជ្ញាធរបានយកចិត្តទុកដាក់លើការគ្រប់គ្រងផលប៉ះពាល់បរិស្ថាន និងការអភិវឌ្ឍសហគមន៍តំបន់ជុំវិញ។ ទោះជាមានផលប្រយោជន៍ច្រើនក្តី ក៏មានការពិភាក្សាដេញដោលអំពីផលប៉ះពាល់បរិស្ថាន និងការផ្លាស់ប្តូរទីលំនៅរបស់ប្រជាពលរដ្ឋដែរ។

ទំនប់សេសានក្រោម២ បានដើរតួនាទីសំខាន់ក្នុងការធានាសន្តិសុខថាមពលជាតិ ពិសេសក្នុងរដូវប្រាំង និងកាត់បន្ថយថ្លៃដើមអគ្គិសនីសម្រាប់ជំរុញការវិនិយោគ។

អត្ថបទសរសេរដោយ មាស តុលា
កែសម្រួលដោយ សោម វិសាល