By រាជធានីភ្នំពេញ – ក្រសួងសុខាភិបាលបានសម្រេចបិទមន្ទីរពហុព្យាបាលឥន្ទ្រទេវី១ ដោយសារមូលហេតុប្រព្រឹត្តខុសក្រមសីលធម៌វិជ្ជាជីវៈធ្ងន់ធ្ងរ ដែលប៉ះពាល់ដល់គុណភាពសេវាពិនិត្យព្យាបាលជូនប្រជាជន។
នាល្ងាចសៅរ៍ទី១៤ ខែមីនា ឆ្នាំ២០២៦ លោក ជិន ប៊ុនធឿន ប្រធានគណៈបញ្ជាការឯកភាពរដ្ឋបាលខណ្ឌ បានសហការជាមួយមន្ទីរសុខាភិបាលរាជធានីភ្នំពេញ ចុះអនុវត្តសេចក្តីសម្រេចលេខ០០៩៧/២៦ អបស/ន.ស.ស ចុះថ្ងៃទី១២ ខែមីនា ឆ្នាំ២០២៦។
មន្ទីរពហុព្យាបាលឥន្ទ្រទេវី១ ដែលមានទីតាំងនៅផ្ទះលេខ៦៥ ផ្លូវលេខ២៧៣ សង្កាត់ទួលសង្កែទី១ ខណ្ឌឫស្សីកែវ ត្រូវបានបិទដោយសារការប្រព្រឹត្តខុសក្រមសីលធម៌វិជ្ជាជីវៈធ្ងន់ធ្ងរ បណ្តាលឲ្យប៉ះពាល់ដល់លទ្ធផលការពិនិត្យព្យាបាល។
ក្រសួងសុខាភិបាលសម្រេចឲ្យលោកស្រីវេជ្ជបណ្ឌិត ឡេង ចេងលាង និងម្ចាស់ទុនទាំងអស់ ត្រូវទទួលខុសត្រូវចំពោះមុខច្បាប់ និងបន្ទុកផ្លូវច្បាប់ទាំងឡាយដែលកើតឡើងអំឡុងពេលសកម្មភាពអាជីវកម្ម។
អគ្គនាយកបច្ចេកទេសសុខាភិបាល អគ្គនាយករដ្ឋបាលនិងហិរញ្ញវត្ថុ អគ្គាធិការក្រសួងសុខាភិបាល និងលោកស្រីវេជ្ជបណ្ឌិត ឡេង ចេងលាង មានភារកិច្ចអនុវត្តសេចក្តីសម្រេចនេះចាប់ពីថ្ងៃចុះហត្ថលេខាតទៅ។
