នគរបាលពោធិ៍សាត់បង្ក្រាបក្រុមជួញគ្រឿងញៀនធំ ឃាត់ខ្លួន៣នាក់ និងដកហូតថ្នាំញៀនជាង១គីឡូក្រាម

ខេត្តពោធិ៍សាត់៖ កម្លាំងនគរបាលក្រុងពោធិ៍សាត់ បានអនុវត្តប្រតិបត្តិការបង្ក្រាបករណីជួញដូរគ្រឿងញៀនទ្រង់ទ្រាយធំ កាលពីថ្ងៃទី១៣ ខែមីនា ឆ្នាំ២០២៦។ ប្រតិបត្តិការនេះធ្វើឡើងក្រោមការដឹកនាំផ្ទាល់របស់លោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់។

កម្លាំងចម្រុះបានចុះបង្ក្រាបចំនួន៣គោលដៅផ្សេងគ្នា។ គោលដៅទី១នៅភូមិស្ពានថ្ម សង្កាត់រលាប ឃាត់ខ្លួនជនសង្ស័យឈ្មោះ ហម ផារិទ្ធ អាយុ៤៦ឆ្នាំ និងដកហូតថ្នាំញៀន៣.៤១ក្រាម។

គោលដៅទី២នៅភូមិមាន់ចែ សង្កាត់ព្រៃញី ឃាត់ខ្លួនជនសង្ស័យឈ្មោះ បុទ្ធិ ទិត្យបញ្ញា (ហៅញ្ញា) អាយុ៣៩ឆ្នាំ។ គោលដៅទី៣នៅភូមិក្បាលហុង សង្កាត់បន្ទាយដី ឃាត់ខ្លួនជនសង្ស័យឈ្មោះ បុទ្ធិ ស័ក្កសេនា (ហៅតុ) អាយុ៣៧ឆ្នាំ។

ក្នុងប្រតិបត្តិការនេះ សមត្ថកិច្ចដកហូតបានថ្នាំញៀនសរុបជាង១.១៥គីឡូក្រាម រួមមាន៨កញ្ចប់ធំទម្ងន់១,១៥៥.៦០ក្រាម។ វត្ថុតាងផ្សេងទៀតរួមមានទូរសព្ទ៣គ្រឿង ម៉ូតូ១គ្រឿង ជញ្ជីងថ្លឹង និងឧបករណ៍ប្រើប្រាស់។

ជនសង្ស័យទាំង៣នាក់សុទ្ធតែមានលទ្ធផលតេស្តទឹកនោមវិជ្ជមាន ហើយបានឆ្លើយសារភាពថា ថ្នាំញៀនទាំងនេះជារបស់ខ្លួន និងបក្សពួកម្នាក់ទៀតឈ្មោះ អែម កុសល់ ដែលកំពុងរត់គេចខ្លួន។

បច្ចុប្បន្ន ជនសង្ស័យ និងវត្ថុតាងត្រូវបានឃាត់ខ្លួននៅអធិការដ្ឋាននគរបាលក្រុងពោធិ៍សាត់ ដើម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់។